NRK Meny
Normal

Ná lea dát ealli 2050:s

Ruoŧa beale ovddeš sámerádiodoaimmaheaddji, Per Nils Idivuoma, čájehii gieskat iežas dáidagiid Roavvenjárggas. Dáidagiid bokte son geahččala muitalit boazodili boahtte áiggi.

Boazu

Boahtte áiggi boazu

Foto: Arne Ivar Johnsen / Nrk

Muhtun jagi duohken lea luondu sákka rievdan ja boazu dan mielde, lohká son. Son lea maid muoras ráhkadan sieiddi man bokte olbmot ovddeš áiggiid sávve oažžut buori birgejumi eallimis.

Per Nils Idivuoma

Per Nils Idivuoma.

Foto: Arne Ivar Johnsen / Nrk

Suoma bálgosiid ovttastumi Boazoparlameanttas Roavvenjárggas mannan vuossárgga lei fáddán "ođđa innovašuvnna bohccos".

Boazoparlameanttas lei maid min ovddeš bargoskibir, Ruoŧa sámerádio doaimmaheaddji Per Nils Idivuoma, čájeheamen iežas dáidagiid.

Roavvenjárggas son čájehii guokte dáidaga ja álggos lea dás sáhka sieiddi birra maid son lea muoras ráhkadan. Ovddeš áiggiid adde oainnat olbmot dasa iešguđetge lágan diŋggaid danin go dákkár dahku galggai de buktit eallimii lihkku.

Go luondu nuoskiduvvo de boazu gártá gillát

Seaidi

Seaidi muoras

Foto: Arne Ivar Johnsen / Nrk

De lea Per Nils Idivuoma dahkan dakkár imašlaš bohcco mii vel geavaha čalbmelásaid ja dien dáidaga bokte son geahččala govvet boazodili boahtte áiggi.

Dás lea sáhka das mo luondu dađistaga billašuvvá ja boazu hábmejuvvo de dan vuođul. Eatnamat gáržut ja mirkkut lassánit ja boazu ii leat šat dalle seammalágan go otne, lohká Ruoŧa sámerádio ovddeš doaimmaheaddji Per Nils Idivuoma.