Eamiálbmotfestiválas lávejit dieđusge leat beakkálmasat ja ii dán jagige leat eará láhkai, go dohko bohtet nugo Mari Boine ja Arvvas.
Eahkedis diibmu beal čiežas de bajidit jiena ja cahkkehit čuovggaid váldolávddis, ja Arvvas de álggaha riemuid ovttas Ruošša beale, Tuva joavkkuin Chilgirchin.
– Mii leat golbma beaivvi ráhkkanan čuojahit ovttas lávddis. Dat dat gal de šaddá varas buvtta, Arvvas -joavkku Sara Mariella Gaup muitala NRK:i.
Loga Norgga ja Ruošša beale musihkkáriid ovttasbarggu birra eanet dás.
Dán jagi Riddu Riđđu –festivála lágiduvvo 24. geardde, ja festivála stuorru ahte stuorru. Sii leat várren lagabui 12 miljovnna ruvnno dáidda doaluide, ja danne sii maid bastet ruhtadit dovddus artisttaid. Go East Journey/Yothu Yindi ii sáhttán boahtit, de beassat sin sajis lávvardaga lávddis oaidnit Mari Boine oktan erenoamáš gussiin Frode Fjellheimain.
Dás oainnát Riddu Riđđu –festivála prográmma, duorastagas gitta sotnabeaivái.
Riddu Riđđu –mánáidfestivála álggii jo ikte, ja beaivet ledje 120 mánás dakkár barggut go guollegoikadeapmi, riiden ja dolastallan.