Njealji oassegilvvus gilvalit artisttat beassat Melodi Grand Prixa loahppagilvui mii lea guovvamánu 19. beaivvi.
NRK Urbi leat háleštan Håkon Guttormseniin ja Bilal Saabain moadde beaivve ovdal almmuheami.
Njuolgga loahppagilvvuide
Northkid čuojaha njealját oassegilvvus guovvamánu 5. beaivve, muhto sii leat jo beassan loahppagilvvuide.
– Lea áibbas jáhkkemeahttun beassat njuolgga loahpagilvvuide, muitala Håkon.
Gándda guovttos muitaleaba ahte sii ledje NRK:in čoahkkimis, mas plánejedje mo lávdešovva galgá.
Muhto ovdal go čoahkkin álggii, de ožžo dieđu man eai lean vuordán.
– «Dii galgabehtet loahppagilvvuide», sii lohke.
– Mii eat ádden maid oaivvildedje, nu ahte mii čohkkáimet dies dego gažaldatmearkan, muitala Bilal.
Son muitala ahte šattai áibbas jaskat lanjas moadde sekundda ovdalgo áddejedje mii lei dáhpáhuvvan.
– Mun jáhkán mun čohkkájin 5 minuhta ja dušše gehččen áibmui go in ádden in maidige, muitala Håkon.
«Someone»
Šuoŋa namma lea «Someone» ja dan leat Helge Moen, Sandra Lyng, Alex Charles ja Jim Bergsted čállán.
– Sis lea várra leamaš oktasaš dovdu, mii guoská ráhkisvuhtii maid buohkat leat vásihan. Nu lea várra šaddan nu realisttalaš, muitala Håkon.
- Dál gal ii dáhpáhuvvan justa ná, muhto ná čálle lávlagiid ovdal:
Soai muitaleaba ahte šuokŋa lea veahá morašlaš. Dat lea dan birra go nubbi ii šat ráhkis nuppi.
– Hooka lávlagis han lea «I was someone you loved, now I’m someone you hate». Dat lea veahá «au», lohká Bilal.
Fina guldaleamen!
Mii jearaimet P3 musihkkahoavddas, Ida Eline Tangenis, moadde gažaldaga Northkid birra.
Mo don čilgešit Northkida sidjiide geat eai vel dovdda sin?
– Mun dajašin: Don dieđát Bilal, son gii vuittii Stjernekamp 2019:s ja lávllui ovttas guovžžain Maskoramas diibmá? Son gii lávlu nu issoras bures? Son lávlu ovtta Norgga eanemus gelddolaš popjoavkkus. Ovttas njeljiin eará gánddain son lávlu hearkkes davviriikkalaš popa. Fina guldaleamen!
- Háliidat go eambo diehtit Northkid birra? logas dán:
Lea oalle alla kvalitehta dán jagi MGP:s. Man dásis Northkid lea? Mo jáhkát sin ceavzit?
– Juo, lea olu buorre musihkka dán jagi, ja šuokŋa mainna Northkid searvá lea mu mielas dat buoremus maid sii leat dán rádjai ráhkadan.
Davvinorgalaččat leat áŋgirat jienastit iežaset guovllu olbmuid, muhto lean sihkkar ahte dán háve eai leat dušše sii geat jienastit Northkida.
Lea go boyband «inn» fas?
– Hehe, bohtet jámma boybandat mat begget hirbmadit, nu go One Direction ja BTS. Mun ledjen mánná 90-logus ja bajásšadden A1:in ja Backstreet Boysain, nu ahte boybandat boktet dovdduid, nostalgiija ja muittuid nuoraidklubba dánsunláhttis.
Gullogoahtá go son Northkid P3:s?
– Jo!
Sámi designa
Melodi Grand Prixas lea dakkár lávdi gos vaikko mii dáhpáhuvvá lávddis.
Makkár biktasat? Maid lávddis dahket? Mo šarmerejit gehččiid?
– Mu vásáhus lea ahte don fertet leat nugo ieš leat. Jus it leat, de gávnnahalat viđa minuhtas, muitala Bilal.
Go lea gárvvuin sáhka, de šaddá vearrát. Lea váttis gárvvuhit joavkku, muhto soai lohpideaba ahte eai boađe álás.
– Mun lean háleštan veahá Hánnáin ja Livein, soai geat jođiheaba Gobmi/Ghost mearkka, ja livččii hui somá jus sáhtášin ovddastit sámi kultuvrra sudno biktasiiguin, lohká Håkon.