Badjelaš guoktelogis ledje čoagganan Davvi Álbmogiid guovddážii, Olmmáivággái "Mearrasámi portála" rahpamii. Olbmot leat duođái vuordán dán.
Manne dákkár sierra portála
Dálá NRK-Sámi direktevre Mona Solbakk jođihii ovdal Davvi Álbmogiid guovddaža go dát bargu alggahuvvui. Solbakk muitala ahte go ovdamearkadihte galgá ohcát dieđuid mearrasámiid birra nugo Googelis, de dávjá bođii diehtu ahte dan maid ohcá ii oba gávdnoge, danne ilmmái jurddá ásahit sierra mearrasámi portála, lohká Solbakk.
Jurddá dáinna portálain lea ahte deavdit buot dieđuid mearrasámiid birra, nu go ovdalaš dáhpáhusaid ja maiddai dat mii dálá dáhpáhusaid ja dieđuid. Geavaheaddjit besset ieža maid buktit dieđuid. Portálas beassa oahpasnuvvat Davvi-Romssa mearrasámiid kultuvrii ja historjái.
Dehálaš geavaheddjiide
Ovddeš Gáivuona musihkkaskuvlla rektor Liv Rundberg mielas lea dehálaš go dát portála viimmát ilmmái. Rundberg sávvá ahte portálii sáhtášii vurket lávlagiid ja sálmmaid mat leat ilbman mearrasámi guovlluin. Son jáhkka ahte olbmot bohtet geavahit dán go vuos lea ilbman.
Rundberg sávvá ahte portálii ilbmet olu máidnasat ja muitalusat mat gávdnojit mearrasámiid birra dáppe Davvi-Romssas. Olmmáivággilaš Jenna Dalvik láidestii badjelaš guoktelogi berošteaddji luđiin, lávlagin ja sálmmain portála almmuheamis.
Gula Mona Solbakk čilgema manne lea dárbu dákkár portálii:
Gula Liv Rundberg vuordámušaid portálii: