Mearrasámi kultuvra máilbmái

Spánska Pullmantur fitnodat sádde guokte stuorát turistafatnasa Porsáŋgui geassemánus ja Rávttošnjárggas leat gergosat čájehit mearrasámi kultuvrra turisttaide.

Kaia i Hamnbukt Porsanger

Hávdna Porsáŋggus gosa turisttat bohtet

Foto: Arne Ivar Johnsen / NRK
Knut Roger Hanssen

Porsáŋggu gieldda sátnejođiheaddji Knut Roger Hanssen

Foto: Arne Ivar Johnsen / NRK

Ovdalgo turisttat nie guhkás ollejit de han álggos fertejit beassat gáddái Hávdnii Leavnnja čoahkkebáikki nuorttabealde. Go ii gávdnon ruhta oastit dakkár Seawalk čovdosa, mii lea ráhkkanus mii govdu čázis ja man miel olbmot beasašedje fatnasis gáddái váccašit, de fertii Porsáŋggu gieldda sátnejođiheaddji Knut Roger Hanssen fuomášit eará čovdosa. Knut Roger fuomášii suvdit spánskalaččaid gáddái smávit gádjunfatnasiiguin masa son lea oalle duhtavaš.

Rávttošnjárggas ráhkkanit

Gry Ingebretsen

Rávttošnjárgga luondduviesu- ja musea beaivválaš jođiheaddji Gry Ingebretsen

Foto: Arne Ivar Johnsen / NRK

Rávttošnjárgga luondduviesu- ja musea bargit leat ráhkkaneamen vuostáiváldit spánskalaččaid geat bohtet sin gálledit geassemánu 6. beaivvi. 3 joavkku, juohke joavkkus gaskal 20 ja 80 turistta, leat dieđihan boahttit Rávttošnjárgii. Gry Ingebretsen, guhte lea Rávttošnjárgga luondduviesu- ja musea beaivválaš jođiheaddji, muitala ráhkkaneamen turisttaide muitalit Finnmárkku luonddu- ja kultuvrra birra. De sii áigot sidjiide čájehit video filmma sámi 8 jahkeáigodaga birra. Lávus sii áigot muitalit sámi kultuvrra birra ja diktit turisttaid máisttašit báikkálaš borramušaid.

Nuorra nieida ges áigu juoiggastit turisttaide

Anna Ellinor Hansrud

15 jahkásaš Anna Ellinor Hansrud áigu ges juoggastit turisttaide geat bohtet

Foto: Arne Ivar Johnsen / NRK

15 jahkásaš Anna Ellinor Hansrud áigu juoiggastit guokte luođi turisttaide muhto son ii leat vel mearridan makkár luđiid son áigu juoigat. Anna Ellinor muitala juo unnin gullan luđiid cd skearruin ruovttus ja ná son lohká leat oahppan juoigat. Lohká vel leat veahá balus danin go dát turisttat orrut sutnje leamen oalle apmasat.

Dá álggos Porsáŋggu gieldda sátnejođiheaddji Knut Roger Hanssen dasa mo turisttaid oažžut gáddái.