Mánát báitet lávddi alde máttuideaset gillii

• Les saken på norsk

– Mun lean Liza ja dán festiválas hálan sámegiela ja dat lea hirbmat buorre, lohká lujávrilaš Elizaveta (Liza) Rakhmanina čielga gielddasámegillii.

Olus eambbo go dán son almmatge ii máhte dadjat máttuidis gillii.

Gielddasámegiella leage Unesco áiton gielaid rukseslisttus. Dat lea garrasit áiton giella. Unnitgo 700 olbmo hállet giela. Eanaš dáin leat eallilan olbmot.

Elizaveta lea okta masá 50 oasseváldis dán jagi riemuin Olenegorskas. Oassálastit bohtet iešguđet báikkis Guoládagas.

• Loga: Koronavirus dahká áiton giela dili vearrábun

Máidnasat ja divttat

Máinnasgávpoga álggahedje 16 jagi dás ovdal. Dasa lassin leat musihkkariemut.

Riemuin mánát čájehit iešguđetlágan máidnasiid ja čájáhusaid teáhterhámis gielddasámegillii ja lohket maid divttaid.

Lágideaddjit lohket riemuide leat stuorra dárbbu.

– Mis lei lávlun ja luvv`t kulturfestivála ja máinnas lea maid dehálaš oassi kultuvrras, erenoamážit mánáide. Šattai menddo olu go musihkka- ja mánáidriemut ledje ovttas. Danne mii leat mearridan lágidit mánáide sierra riemuid, čilge lágideaddji Roza Jakovleva.

• Loga: Ovddideaba áiton giela buoremus sáddenáiggis

– Giella darvána oaivái

Guoládaga sámiid searvvi ovddeš presideanttas lea sierra bargu mánáidriemuid oktavuođas. Son čállá teavsttaid rollaide sihke sámegillii ja ruoššagillii.

– Go mánát ohppet daid smávva rollaid sámegillii, de dat ohppet maiddái sámástit. Ii nu olu, muhto sámegiel sánit goit darvánit oaivái. Sii eai sámás juohke beaivvi, muhto dáin riemuin sii ohppet sámástit ja dat čuovvu sin bajásšattadettiin, lohká Nina Afanasjeva.

Elizaveta lea riemuide oassálastán das rájes go lei unni. Son lea duhtavaš dán jagi riemuiguin.

– Hirbmat somá, lohká son.

• Loga: Roman (34) ovddida musihkain áiton giela

Ovcci fáktora, mat váikkuhit gielladillái

Gielddasámegiela dilli lea duođalaš.

Eanaš gielddasámegielagat leat badjel 50 jagi, ja giellamáhttu ii sirdašuva buolvvas bulvii.

Lujávrri vuođđoskuvllas ii leat gielddasámegiella geatnegahtton fágan. 30 oahppis lea sámegiella válljenfágan ovtta diimmu vahkkui.

Joatkkaskuvllain ii gal sáhte oahppat giela.

Gielddasámegillii leat unnán girjjit almmuhuvvon. Rádios dahje televišuvnnas eai leat jeavddalaččat gielddasámegiel sáddagat.

Iige leat sierra neahttasiidu iige áviisa mii fállá ođđasiid dahje áigeguovdilis ságaid gielddasámegillii.

Unescos leat ovcci fáktora, mat leat mielde váikkuheamen gielladillái:

• Man muddui giellamáhttu sirdašuvvá buolvvas bulvii.
• Man stuorra oassi álbmogis, masa giella gullá, hállá giela.
• Man stuoris lea čearda, mii hállá giela.
• Man láhkái lea dilli dain servodagain, gos giella geavahuvvo.
• Man muddui geavahuvvo giella servodagas ja dieđihangaskaomiin.
• Man muddui leat oahpponeavvut dan gillii.
• Makkár guottut leat eiseválddiin veahádatgillii.
• Makkár guottut veahádatálbmoga lahtuin leat alddiineaset iežaset gillii?
• Man gallis hállet giela.

Dáid fáktoriid dáfus orru gielddasámegiela dilli bihkkaseavdnjat. Giellageavaheaddjit dat ieža sáhttet seailluhit ja ovdánahttit giela, jus sis duođaid leaš dáhttu

• Loga: Unesco: – Norgga bealde ii oktage hála ubmisámegiela