Fovse-akšunisttat sáhkohallet

Les saken på norsk.

Dan dieđiha Luondu ja Nuorat preassadieđáhusas.

Politiijat bivde čakčat bissehit áššáskuhttima, muhto stáhtaadvokáhtta lea mearridan sáhkohit akšunisttaid.

– Lea ilgat go nuorra sámi akšunisttat ráŋggáštallojuvvojit, muhto stáhta, mii lea rihkkon olmmošvuoigatvuođaid badjel guokte jagi, beassá friddjan. Dan dadjá artista ja neavttár Ella Marie Hætta Isaksen.

Son lea okta dain guhte leat sáhkohallan go eai guođđán báikki go politiijat bivde su.

– Stáhta válljii baicce notkat min vuosttildeami, ovdaliigo váldet ovddasvástádusa ja bissehit olmmošvuoigatvuođarihkkuma. Mun in dohkket sáhkku dán ovddas, dadjá Isaksen.

Čalmmustahtte 500 beaivvi

Akšuvnnat gevve dan oktavuođas go ledje vássán 500 beaivvi dan rájes go Alimusriekti celkkii ahte guokte daid bieggafápmorusttegiin mat leat ceggejuvvon Fovsei Trøndeláhkii rihkkot eamiálbmot rivttiid. Bieggaturbiinnat leat ceggejuvvon guovlluin maid boazoealáhus lea geavahan.

Ráđđehus lea bargan čovdosa gávdnat dasa mo duomu sáhttá čuovvulit nu ahte eai dárbbaš njeaidit turbiinnaid, mat leat máksán miljárddaid.

Akšunisttat ledje Oljo- ja energiijadepartemeanttas (OED) masá njeallje jándora ovdalgo politiijat gudde sin olggos.

– Mii manaimet OEDii go stáhta lea beahttán Fovse badjeolbmuid. Lea imaš go stáhta sáhttá rihkkut olmmošvuoigatvuođaid váikkuhusaid haga, muhto mii, geat vuosttildat dan, ráŋggáštuvvot. Mun in dohkket sáhkku, dadjá akšunista Ida Benonisen.

Akšunisttaide lea čoggon máŋgačuođiduhát ruvnnu fondii, mainna galget beassat máksit sáhkuid ja juridihkalaš veahkki jos dan dárbbašit.

– Mun in áiggo viežžat ruđa dan foanddas máksit iežan sáhku, go dan in áiggo máksit, dadjá Benonisen.

Akšunisttain lea vihtta beaivvi mearridit máksetgo 5000 ruvdnosaš sáhku, vai eai, muitala akšunista Elle Risten Appfjell Eira.

– Mun in jáhke mun boađán máksit. Lea prinsihpalaš sáhka, ahte mii galgat sáhkohallat dušše go mii leat lokten ášši. Duohtavuođas leat mii dušše muittuhan OED ja Støre ahte Fovse-ášši ii leat čielgan duomu maŋŋel, dadjá Eira.

Háliidii áššáskuhttinbissehusa

Stáhtaadvokáhta ii háliit muitalit man stuorra sáhkuid sii leat addán akšunisttaide. Sii eai ge háliit muitalit man gallásiid leat sáhkohan.

Golggotmánus bivde politiijat bissehit daid 28 akšunisttaid áššáskuhttima, geat giddejedje OEDii beassama guovvamánus, vai eai galgga sáhkohallat.

– Mii leat árvvoštallan eará láhkai. Min mielas lea dás vuođđu sáhkuhit akšunisttaid, dadjá stáhtaadvokáhta Oslo stáhtaadvokáhtaámmáhiin, Irlen Irgens.

Son ii hirpmástuva jos akšunisttat eai dohkket sáhkuid.

– Dalle lea duopmostuollu mii šaddá dán meannudit, dadjá Irgens.