Lujávrri nuorain ođđa čuoiganmokta

– Dat gal lea buorre ja somá go dás lea čuovga dál ja mii beassat hárjehallat skuvlla maŋŋá, vaikko skábmaáigge. Ovdal eat duostan čuoigat go balaimet láhppomis seavdnjadasas, illosa Nikita Kuzmičev (13).

Lujávrilaččat eai leat 30 jahkái beassan skábmaáigge čuoigat čuovgaláhtus go buot čuovggat leat suoláduvvon dahje biliduvvon.

Dál lea viimmat dát ášši čoavdašuvvan.

• Loga maiddái: Koronavirus dahká áiton giela dili vearrábun

Eallán seavdnjadasas

Lujávrri čuoigit leat guhká eallán seavdnjadasas.

1990-jagiin dán láhtus bilidedje ja suoládedje visot jođđasiid ja lámppáid. Dasa lassin leat stoalpput sahájuvvon boaldinmuorran.

Ođđa stoalpput ja čuovggat leat gieskat ceggejuvvon nuoraid dáhtu mielde. Buot ávdnasat ja barggut mákse oktiibuot miljon rubela dahje masá 150 000 Norgga ruvnnu.

– Lujávrri nuorat bohte mannan geasi mu lusa dakkár jurdagiin divuhit Lujávrri láhtu ja bidjat dasa čuovggaid. Min prošeakta lea ožžon doarjaga ja ruhtadeami. Oasi ruđain leat addán maiddái Lujávrri dábálaš ássit ja gávpeolbmát.

Dan muitala hárjeheaddji ja Lujávrri gielddaráđi áirras, Janis Šebut.

Láhttui leat ceggen golbmalogi stoalppu. Dasto leat biddjon johtasat, lámppát ja elrávdnji. Bargguid lea čađahan Lujávrri gávpealmmái.

• Loga maiddái: Roman (34) ovddida musihkain áiton giela

– Mis leat eambbo sávaldagat

Šebut lohká olbmuid dáhttu dehálažžan dakkár prošeavttain.

– Lea dehálaš go ieža ássit bohtet ja fállet jurdagiid ja fálaldagaid, man láhkái lea vejolaš buoridit eallima Lujávrris. Mis dál doaibmá dakkár prográmma mainna gielddaráđđi sáhttá doarjut olbmuid buriid álgagiid ja oažžut dasa ruđa.

Dál čuvgejuvvo álggos dušše kilomehtera láhtu, muhto plánas lea guhkidit dan guovtti kilomehterii. Nuorat ja mánát háliidit dál eambbo.

– Livččii buorre jus divuhivčče maid valáštallanšillju, go mis Lujávrris ii leat albma sadji gos beasašeimmet čiekčat spáppa, sávvá Nikita Kuzmičev.

• Loga maiddái: Sámiráđi ovddeš presideanta njoammudii koronavirusa iežas eamidii ja bárdnái