Leago son Norgga searamus?

Ihttin álgá NRK TV-ráidu "Norges tøffeste", mas logis gilvalit šaddat Norgga searamussan. Okta dain lea kárášjohkalaš Aslak Ole Eira.

Aslak Ole Eira er med i Norges tøffeste

Lávvordag gilvala Aslak Ole Eira ovcci eará searaiguin NRK tv-ráiddus "Norges tøffeste".

19-jahkásaš Kárášjoga boazosámi bárdni, Aslak Ole Eira gal ii dárbbaš motorfievrru go dolle meahcastallat, sus leat alddis doarvái fámut.

Go NRK Sápmi su galggai jearhallat dan vahkku, de fertii reporttar vuos su doarredit čuoigga Čárájávregáddái, gosa son iežas skuvlavielljaiguin Ráissa joatkaskuvllas lei čuoigan oaggut.

– Dát gal lea somá, guttaiguin vuolgit oaggut. Dat gal lea váttis dán časkkit gal. Dat gal ferte Liverpool-tuvra, stuora kampaid geahččat doppe Liverpoolas, jus galgá buoret go dát, lohká son.

Guođoha ealu čuoigga

Ii son čuoigga dušše oagguntuvrii, diibmá son šattai dovddusin go ii leat dego eará boazodoallit, go čuoigga son maid guođoha ealu.

Geahča video dás: Aslak Ole (18) gjeter reinflokken sin på ski

Ihttin beassat oaidnit mot Aslak Ole birge ovcci eará searaiguin "Norges Tøffeste"-TV ráiddus.

– Norges tøffeste TV-ráiddus leat sihke fysálaš ja psykálae hástalusat, ja go leat moadde beaivve gilvalan, unnán borran ja oađđán, de oaidnigoahtá makkár attáldagat sis leat, lohká prográmmajođiheaddji Per Olav Alvestad NRK:ii.

– Garra olmmái

Skuvlaviellja Vebjørn Krogh Pedersen gal rámposta olbmá ja ii loga ovttage nu searran go son.

– Ii oktage leat searat go Aslak, lean leamaš su fárus duoddaris ja son lea duođái ruovdi. Son lea erenoamáš garra olmmái.

Lávvordaga čájehuvvo vuosttaš oassi NRK1. Ieš Aslak Ole illuda čuovvut Tv-ráiddu, muhto álggus vuos áigu čuoigat ovcci miilla Guovdageainnus Eanodahkii, Saami Ski Race- čuoigamis.

– Mun lean vuos čuoigame dan Saami Ski Race lávvordaga, ja de vuolggán Áltái oappá lusa geahččat premiera. Šaddá somá geahččat mot manná, áistton makkár figura mun lean TVs ja mo NRKa lea nágodan mu govvidit, šattan go goodguy vai douche.