Hopp til innhold

Korte nyheter

  • Midnattsrocken šaddá nu go plánejuvvon

    – Midnattsrocken čađahuvvo.

    Nu čállá Midnattsrocken Facebook-siiddustis. Sii leat bargan birra jándora maŋŋágo SAS-pilohtat manne bargoheaitagii oažžun dihtii artisttaid davás čuojahit konsearttaid.

    – Mii bargat máŋga čovdosiid ovdii, earret eará priváhta girdiin. Mii dáhkat buot maid sáhttit vái oažžut buohkaid deike, čállá Midnattsrocken.

    Masse folk på Midnattsrocken
    Foto: Anders Boine Verstad / NRK
  • Ođđa dálkerádár Guovdageidnui

    Meteorologalaš instituhta cegge ođđa dálkerádára Guovdageidnui, čállá iFinnmark.

    – Sis Romsii ja Finnmárku duoddarii leamaš váttis dieđihit dálkki, dadjá Davvi-Norgga dálkedieđuid ossodaga jođiheaddji Justyna Wodziczo iFinnmárkui.

    Muhto dál nannejit sihkkarvuođa, vai ambulánsagirdiide ja eará girdijohtolahkii lea vejolaš addit buoret dálkedieđuid go johtet guovllus. Árabut dán jagi lea maid Ákŋoluokta ja Bearalváhki ožžon dálkerádára.

  • Sámi magasiidna reastaluvvan

    Sis ja Nuorta Finnmárkku diggegoddi celkkii ikte ahte Isámi Press AS reastaluvvá. Ledje guokte ovddeš bargi geat gáibideigga searvvi reastaluvvat, čállá iFinnmark.

    – Mis lea ain oktavuohta ja eai leat makkárge bahča dovddut min gaskka. Mii leat buohkat dieđus váivvis go ná manai, lohká Sámi Magasiinna beaivválaš- ja stivrrajođiheaddji Jan Skoglund Paltto iFinnmárkui.

    Ovdalaš juovllaid bođii diehtu ahte Sámi Magasiidna gártá máksit ruovttoluotta 4,4 miljovnna ruvnnu preassadoarjagis maid oaččui Mediabearráigeahčus, daningo magasiidna ii deavdán gáibádusa almmuheamis unnimusat 48 almmuhusa jagis.

    Sámi Magasiinnas lea dál birrasii 5 miljon ruvdnosaš vealgi, 4,4 miljovnna vealgi Mediabearráigehččui. Nu dieđihii Paltto sundái Finn Arne Selforsii. Diggegoddi oaivvilda Sámi Magasiinnas ii leat ruhta máksit velggiidis.

    Sámi ođasmagasiidna
    Foto: Fotomontasje: Medietilsynet