Olmmošvuoigatvuođaid komitea, mas leat 18 áššedovdi, gulai nuppelohkái organisašuvnna ovddasteaddji albmanahttimin vuorjašumi das, mo Kanada luondduávkkástallanindustriija fere álgoálbmogiid eatnamiin sihke iežas ja vieris riikkain ja mo gieđahallá álgoálbmogiid.
- Loga lassiin:
Kanada iežas nationála olmmošvuoigatvuođaid komišuvdna ja stuorra organisašuvnnat nu go amerihkálaš Human Rights Watch ja riikkaidgaskasaš Amnesty International ledje bastileamos moitiid gaskkas.
Šaddá gierdat láitagiid
Álgoálbmogat leat guhkit áiggi vuostálastán bihkkasáttobohkamiid iežaset guovlluin.
Foto: NRKKanada ávkkástallanindustriija lea šaddan gierdat garra láitagiid das mo Guatemalas dulbmet álgoálbmogiid olmmošvuoigatvuođaid ja mo iežas riikkas bihkkasáttobohkamat duvdet eret ja nuoskkidit álgoálbmogiid ássan- ja bivdoguovlluid.
Olmmošvuoigatvuođaid gohcin, ollašuhttin ja suodjaleapmi gullá juohke ON-lahttostáhta ráđđehussii ja eiseválddiide, vaikko vel livččege earát go eiseválddit ieža geat rihkkot ovttaskas olbmuid ja joavkkuid olmmošvuoigatvuođaid.
Vuosttas gearddi logi jagis
Kanada ráđđehusas lei maŋŋebárgga vuosttas liiba vástidit láitagiidda ja sárdnut Ovttastuvvan Našuvnnaid olmmošvuoigatvuođaid komiteai.
Komitea lea Genevas árvvoštallamin guđe láhkai Kanada ja guhtta eará lahttostáhta leat čuvvon ja ollašuhttán riikkaidgaskasaš konvenšuvnna siviila ja politihkalaš vuoigatvuođaid birra. Kanada árvvoštallojuvvui maŋimuš 2005:s, ja dán jagi lea vuosttas geardi go riikka konservatiivva ráđđehusa olmmošvuoigatvuođaid meanut ja politihkka dárkkistuvvo.
Ráđđehusa virgeolmmoš mohkastii
Sáhkavuorustis Kanada ráđđehusa virgeolmmoš, Laurie Wright, mohkastii vástideames njuolga komitea gažaldagaide ja organisašuvnnaid fuolastuvvamiidda.
– Vaikko ain leat hástalusat, de mii meannudit áššiiguin, ja joatkit hukset rabas, friija ja ráfálaš servodaga, gos olbmot geain lea iešguđege duogáš, sáhttet eallit bálddalaga ja lieđđut, celkkii Kanada vuoigatvuođadepartemeantta ovddasteaddji Wright ovddalgihtii válmmaštan sáhkavuorustis.
Komitea almmuha gávdnosiiddis ja loahppaárvvoštallamiiddis guovtti vahku geažes.
