– Dán divodit ii šatta hálbbes bargu, muhto mii fertet gal dán geahčadit, dadjá Kárášjoga sátnejođiheaddji Svein Atle Somby.
Son hállá beakkán Ánddir Ivvár Ivvára, dahje Iver Jåks dálu birra. Dállu lea billašuvvamin, ja doppe ii leat šat oruhahtti. Rohpi lea juo vitnjut, ja máŋgga sajis goaiku čáhci čađa.
– Mu mielas gal lea issoras suddu ahte ná lea billašuvvan. Mun haksen guohpahájaid dáppe, ja rohpi lea botnjut. Dat gal lea váivi munnje oaidnit ahte ná lea šaddan, dadjá Somby go fitná NRK mielde Iver Jåksa dálus.
Álggii árrat ođđaáigásaš dáidagiin
Sámi Vuorká Dávviriid musea jođiheaddji, Åse Johnsena mielas galggašii dálu albmaláhkái áimmahuššat. Erenoamážit go Jåks lei nu dehálaš sámi dáiddár.
– Ivvár álggii hui árrat geahččalit ođđaáigásaš hábmenvugiid iežas duojis ja dáidagis. Ja daid hámiid ja symbolaid bokte son čájehii hui čielga sámevuođa, muitala Johnsen.
Son lasiha ahte Iver Jåksa dáidagis lei alla árvu sihke sámi- ja olggobeale dáiddaeallimis. Ja musea jođiheaddji čohkkáge ovtta Iver Jåksa dáidaga bálddas go hállá NRK:n. Namalassii «Ipmiliid dánsun», mii lea reliefa mii lea seaidnái hábmejuvvon.
– Dás lea son govvidan muhtin dain deháleamos ipmiliin mat min máttuin ledje, dadjá Johnsen.
Eanaš áiggi iežas eallinagis oruige Iver Jåks dálus mii dál lea mieskamin.
– Dát dállu lea okta mearka su maŋis, ja eará dáiddalaš oktavuođat leamaš dien dálus, dadjá Johnsen.
- Loga maid:
Eai dieđe gii lea eaiggát
Dáiddaráđđi lea geavahan dán dálu kantuvrabáikin sullii 20 jagi. Ja leat dieđus ferten fárret doppe, go ii leat šat oruhahtti.
Muhto gii eaiggáduššá dálu lea eahpečielggas.
Gielda leamaš eaiggát, muhto Dáiddaráđđi maid lea oastigoahtán dálu. Miessemánus áigot Dáiddaráđđi ja gielda čielggadit eaiggátvuođa dálus.
– Na dieđus mii gal áigut iehčamet bealis aistton geahčadit makkár vejolašvuođat leat ahte dan dálu sáhttá divodit. Mo sáhttá dan ovttasráđiid bargat, ja geat dat galget bargat dan, dadjá Dáiddaráđi stivrajođiheaddji Biret Risten Sara.
Sátnejođiheaddji Somby dadjá ahte go gielda lea čoahkkinasttán Dáiddaráđiin, de gávnnahit ovttasráđiid maid áigot dahkat dáluin.