Ii dohkket buhtadasgáibádusa
Kárášjoga gieldda advokáhta Hannah Stuve deattuhii Sis Finnmárkku diggegottis otne ahte ovddeš oahppi Arnar Vuolab Jørgensen maiddái givssiduvvui go lei oahppi Gáivuonas Davvi Romssas. Son fuomášuhttit maid ahte lea imaš go ovddeš oahppi gáibida dušše Kárášjoga gielddas buhtadusa givssideami ovddas. Vuolab Jørgensen váiddii gieldda go eai bissehan su givssiduvvomis vuođđoskuvllas Kárášjogas. Su bealušteaddji Arvid Kjærvik muittuhii ahte sihke Finnmárkku filkkamánni ja mánáidáittardeaddji leat ovdal cuiggodan Kárášjoga gieldda, go oaivvildit ahte gielda ii váldde givssideami doarvái duođalas. Kjærvik duođaštii dikkis otne ahte buhtadasgáibádus lea badjelaš miljon kruvnna. Gielda ii mieđit iežas sivalažžan, iige dohkket buhtadasgáibádusa.