– Nussir-áššis lean válljen guldalit Fálesnuori gieldda ja sii sávvet dán prošektii bures boahtima, lohká Pedersen, gii ii loga iežas rievdadit gal oaivila dán áššis.
Earáin maid seamma oaidnu
Sámedikki dievasčoahkkimis njukčamánus ságastalle juste dán Nussira ja Gumpenjuni doaimmas. Fálesnuori sátnejođiheaddji Terje Wickstrøm, gii dál lea Davviguovllu válgabiires Bargiidbellodaga Sámedikki evttohaslisttus, lei beahtahallan Sámedikki mearrádusa dihte ja logai dalle ahte áigu váldit ášši ovdan Finnmárkku Bargiidbellodaga jahkečoahkkimis.
Bargiidbellodaga sámediggeáirras Ronny Wilhelmsen gal álggos dáhtui doarjut Nussira ja Gumpenjuni-prošeavtta, muhto válljii čuovvolit iežas sámediggejoavkku. Su viellja Robert Wilhelmsen lea Fálesnuori Bargiidbellodaga jođiheaddji ja doppe gal dáhttot daid doaimmaid.
– Buorre diehtit ovdal válgga
Nu lei jahkebeale áigge. Dál lohká Bivdi mearrasámi bivdiid ja guolásteddjiid searvvi jođiheaddji, fálesnuorrilaš Torulf Olsen, ahte lea olu čuvvon maŋemus vahku ságastallama sosiála mediain, go almmuhuvvui ahte Nuortaguovllu válgabiire dáhttu Bargiidbellodaga joavku deatnulačča Helga Pedersena, gii dál lea stuoradiggeáirras, sámediggepresideantan.
– Lean gullan maid son lea dadjan ja lea hui buorre go čielggada iežas oaivila, go mii fargga galgat jienastit. Álbmot gal dieđusge de diehtá ahte Helga Pedersen doarju ruvkebázahusaid luoitima merrii. Dat šaddá stuora hástalussan Bargiidbellodaga jienasteddjiide, jáhkká Olsen.
Torulf Olsen lea maid ovdal olu moaitán Sámedikki váilevaš mearrasámi vuoruhemiid ja go jearrat lea go riekta ahte Helga Pedersen stuoradiggeáirasin ja ovddeš guolástusministtarin lea goaridan mearrasámiid vuoigatvuođaid, de lohká «juo, su mielas goit».
– Sii eai moaitte geaidda guoská
Helga Pedersen oaidná ahte su leat olu fallehan sosiála mediain guolástusáššis ja ahte oaivvildit su goaridan maid mearrasámiid vuoigatvuođaid, masa son gal ii leat ovttaoaivilis.
– Mu mielas ii leat dát moaitámuš mii boahtá sis geaidda dát guoská. Go lean ruovttus fitname Deanus, de olbmot beroštit eambbo eará áššiin, ovdamearkka dihte guolleeriin ja makkár vejolašvuođat leat bivdit gonagasreabbá, lohká Pedersen ja čujuha dasa ahte dál leat baicca lassánan guollebivdit ja -fatnasat ja eanet nuorat maid leat guolásteaddjin.
Helga Pedersen jáhkká iežas sáhttit stivret Sámedikki bures, ja lohká čuovvut bures mielde sámepolitihkalaš áššiin, vaikko eará dávjá gullo. Son oaidná ahte Bargiidbellodat ja Norgga Sámiid Riikasearvi olu áššiin leat ovttaoaivilis ja lohká ahte šaddá stuorra bargu loktet beroštumi sámedikkeválgii.