Duottarmáilmmis miljongávpogii

Lea stuora erohus Guovdageainnu jaskes, ávdin duoddaris ja Bangkoka hušša miljongávppogis. Muhto guovdageaidnulaš John Bernhard Henriksen gal loaktá bures Bangkokas.

John Bernhard Henriksen

(Vuorkágovva)

Foto: Johan Ante Utsi / NRK

Jođu lea buoret go oru. Sápmelaš láhkadovdi John Bernhard Henriksen lea orron moaddelot jagi olgoriikain ja mángga riikas orron. Dál orru Thaieatnama oaivegávpogis, Bangkokas, muhto lea farggá fárreme New Yorkai.

- Lean guhtta jagi orron dáppe ja hárjánan sihke báhkkasii ja olmmošvalljivuhtii, lohká son.

Ášši doaimmaha Simmona Máhtte.

Soaittáhagas olgoriikii
Son ii ge loga gal nu dihtomielalaččat goassege mearridan ahte olgoriikas son háliida orrut ja bargat. Muhto maŋŋel láhkaoahpu sorrui son olmmošvuoigatvuođa-bargguide ja barggut dolvo su máilbmái. Ja dál lea bearaš fas fárreme.
- Eamit lea álgán ođđa bargui ON:as New Yorkas, ja dál giđđat fárren mun ge dohko.

Lunddolaš fárret olu
Diehttelasat son muhtumin áibbaša davas, ruovttoguovlluide. Unnimusat oktii jagis galleda son fulkkiid sámis. Muhto son eahpida gal ahte goassege fárre ruovttoluotta Guovdageidnui.
- In duostta lohkat dan nu sihkkarit. Mun lean ollu fárren ja juohke báikki lean váldán dego muhtun lágán ruoktobáikin. Ja ain gártan ollu riikain orrut ovdal go sajáiduvan. Dál mun lean orron nu guhká olgoriikain ahte orru lunddolaš munnje orrut feara gos.

Doalahan Sámegiela
Bangkokas orrot sullii 10 miljovnna olbmo ja olles riikas badjel 63 miljovnna. Váldogiella lea thai-giella. Muhto John Bernharda váldogiellan lea šaddan engelasgiella.
- 99 % buot mu čálalaš ja njálmmalaš barggus lea engelasgillii. Sámegiela gal lean nagodan doalahit, ja beaivválaš ságaid gal lea álki humadit. Muhto mun bártidan dainna ođđaáigáhaš, virggálaš sámegielain, mieđiha son.