Guossohedje dearvvaslaš borramuša vuorasolbmuide ja álbmogii

Máistte sámi báikkálaš lagaš borramuša. Dákkár bovdehusa oaččui Kárášjoga álbmot Kárášjoga dearvvasvuođaguovddážis dán vahkus.

Sámi álbmoga buohcciidruovttu ovddidanguovddaš dat lei bovdehusa duogábealde.

Ikte bessege olbmot máisttašit feara makkár herskuid dearvvasvuođaguovddáža boradanlanjas.

– Na, dál gal ferten vuos suovastuvvon bohccobierggu máistit, lohká prošeaktajođiheaddji Ragnhild Nystad.

Dego fiidnámus restoráŋŋa

Go oaidná buot herskuid de galggašii gáddit mii leat buot fiidnámus restoráŋŋas. Dás leat buotlágan herskut; bassojuvvon goikeguolli ja iešguđegelágan bohccobiergomállásat.

– Dákkár borramuš gal berrešii masá juohke beaivvi buohcciide, árvala Nystad.

Dát borramušbeavdi lei ikte Kárášjoga boarrásiidsiiddas, gos prošeaktajoavku almmuhii rápportta mii bealušta sámi árbevirolaš borramušaid.

– Rivttes ja oahpes borramuš addá maid buoret dearvvasvuođa, deattuha joavkku prošeaktajođiheaddji Ragnhild Nystad.

Deaivvaimet goahka Allan Johansena go lei málesteamen suovasbierggu. Son rámida bohccobierggu ekologalažžan, iige loga das váralaš buoiddi nugo sávzza-, spiinni- ja burrubierggus.

Čorgatvuohta gáržžida málestanvejolašvuođaid

Rápporta ávžžuha árbevirolaš sámi biepmuid fállat buot sámiide geat leat boarrásiidsiiddain ja fuolahusruovttuin.

Prošeaktajoavku lea guorahallan mo livčče vejolaš boarrásiidsiiddain ja fuolahusruovttuin fállat eanet sámi árbevirolaš borramušaid, muhto garra čorgatvuođanjuolggadusat bohccovara luoitimii gáržžidit ásahusaid málestanvejolašvuođaid.

Almmolaš ásahusain, káfeijáin ja guossohanbáikkiin ii leat lohpi badjeolbmos njuolgga oastit bohccovara, ja Norgga bealde lea goasii veadjeameahtton gávppis gádnat dákkára.