Guhkes áigi vuordit dikšui beassat
Olles Norggas šaddet nuorat ja mánát, geat rahčet psyhkalaččat, vuordit mánggaid mánuid ovdalgo ožžot veahki. Ja Romssa Mánáid- ja nuoraidpsykiatriija ossodahkii lea erenoamáš váttis beassat. Mánáid dilli vearrána veahki vuorddedettiin, dadjá Mánáidáittardeaddji. Maiddái Romssa poliklinihkain leat váldigoahtán oktavuođa dávjjit go ovdal, ja dat lea lassánan 30 prosenttain maŋimuš áiggi. Dál leatge oččodeamen lasi áššedovdiid vai vuordináigi oanošii, dadjá Davvi-Norgga Universitehtabuohcceviesu Nuoraid ja mánáid psykiatriijaossodaga jođiheaddji Børge Mathiassen.