– Dat lea somá, veahá issoras ja dieđusge issoras stuorra gudni. Mun lean ieš sullii beannot mánu diehtán, ahte dát geigejuvvo munnje. Dál lean hárjánišgoahtán jurdagii, muhto lean ain veahá balus go dohko bohtet alla hearrát ja feara geatge, dovddaha Rajala NRK Sápmái.
Sierra meanuin Deanu ráđđeviesus geigejuvvo Gonagasa ánsomedállja Britt Rajalai bearjadaga.
Jorgalanbargu álggahuvvui 1980-logu loahpas. Mielde dán barggus ledje golmma riikka sápmelaš gielladutkit ja jorgaleaddjit. Biibbal 2019 almmuhuvvui Guovdageainnus jagi 2019 borgemánus.
– Bargu lea leamaš hirbmat gáibideaddji. Hástalus lei čállit teavstta mii heivešii olles davvisámi giellaguvlui, ja masa gullet máŋga suopmana ja iešguđetlágan giellaárbevierut Norgga, Suoma ja Ruoŧa bealde, čilge Biibbalsearvvi váldočálli Paul Erik Wirgenes Vårt Land áviisii.
Wirgenes lohká barggu bures lihkostuvvan. Ođđa Biibbalii lea stuorra beroštupmi ulbmiljoavkkus.
Eallinagibargu
Rajala lohká dán barggu mearkkašit sutnje maid olu.
– Dát lea mu eallinagibargu. Dáinna stuorra čállosiin lea leamaš hui olu bargu. Mushan leat oppa áigge leamaš buorit joavkkut birra. Ođđa Testameantta áigge leigga Nils Jernsletten -rohkki ja Per Oskar Kjølaas ovttas muinna váldojoavkun. Dasto ledje vel máŋggas earát mielde, čilge Rajala.
Son deattuha, ahte sidjiide maid gullá stuorra gudni.
Ovddit Biibala jorgalii Guovdageainnu stuimmiid fáŋga Lars Jakobsen Hætta. Son lei dubmejuvvon jápmimii, muhto son árpmihuvvui ja beasai gárvet Biibbal-jorgaleami.
Vuosttaš davvisámegiel Biibbal gárvánii jagis 1896. Ođđa Biibbal almmuhuvvui 123 maŋŋá.
– Dat lei hirbmat stuorra bargu maid Lars Jakobsen Hætta dalle dagai. Son čuovui eanaš dánskkagiel Biibbala. Das rájes lea olu biibbaldutkamuš dáhpáhuvvan ja álgoteaksta lea sakka rievdan, čilge Rajala.
Davvi-Hålogalándda ovddeš bisma, Per Oskar Kjølaas, rámida dan barggu maid Rajala lea dahkan.
– Dán barggu duohken lea višuvdna ja stuorra ráhkisvuohta davvisámegillii ja sámi álbmogii. Jurdda lea, ahte boahttevaš buolvvat galget sáhttit lohkat ja geavahit Biibbala. Britt Rajala gelbbolašvuohta sámi gielas ja kultuvrras lea dán barggus mávssolaš, dadjá Kjølaas Vårt Land -áviisii.
Gonagasa guossái
Maŋŋá Gonagasa ánsomedálja juohkima gielddastivrralanjas bovdejuvvo mállásiidda searvegoddevissui.
Gonagasviesu ja gielddahálddahusa ovddasteaddjit čuvvot meanuid.
Biibbalsearvvi ovddasta váldočálli Paul Erik Wirgenes.
Maŋŋelaš dán jagi bovdejuvvo Britt Rajala šlohttii Osloi Gonagasa guossái.
– Dat gal orru vel ipmašeappot. Dohko mun gal dieđusge ferten mannat. Dat gal lea dan mađi stuorra gudni. Sámi Radio eadni Kathrine Johnsen ja mun, in dieđe leatgo eará Deanu sámenissonat ožžon dán gudni. Dat gal orru leamen somá, dadjá Britt Rajala ja mojohallá.