Golbma buolvva dollet odne almmuhankonseartta olgolávddis musea luhtte Buolbmágis dii 20.00. Doppe juoigá maiddái Márggeha bárdni, Anne Lise viellja ja Ida Márjjá eanu, Magne Ove Varsi.
– Livččii somá jus olu olbmot bohtet guldalit min odne, lohká Ida Márjá Varsi Solbakk.
– Guovllu luođit eai galgga jávkat
– Mii gulasteimmet sin juoigamin ja beare fertiimet ráhkadit CD vai eambbosat besset guldalit čábbámus Deanuleagi luđiid, celket lágádusa Čálliidlágádusa bealis.
Dán CD:s leat árbevirolaš luođit Čorgašnjárggas ja Deanus, ja lassin vel ođđa luođit. Boarraseamos luohti navdo leat birrasii 1850-logus. Eanaš luđiide leat bidjan instrumeanttaid.
– Guovllu luođit eai galgga jávkat, baicce gullot ain. Dán CD:ii leat darvvihan dušše oasáža guovllu juoigan-árbevierus. Mii gal eat eahpit, dáinna CD:in Golbma buolvva dahket alcceseaset saji máilmmemusihkkii, celket Čálliidlágádusas.
Alitvárri
Váldoluođi ja CD namma lea "Alitvárri”. Áhkku Márgget oahpai eatnistis dán luohtešuoŋa ja muitalusa beakkán Alitvári birra, mii lea Čorgašnjárggas. Muitalusa leaba Márgget ja Anne Lise heivehan luohtái.
– Eadni lea ráhkadan eanaš daid luđiid, šuoŋaid, dán CD:s. De leat ovttas sániid bidjan daidda, muitala Anne Lise Varsi.
