Gáibidit beassat oamastit beali Deanu gielddas

Badje Deanu Siida lea sádden sierra gáibádusa Finnmárkokommišuvdnii mii lea kártemin dálá geavahan- ja eaiggátvuođaid maid sámi álbmot ja earát ležžet olahan guhkesáiggi geavaheami vuođul.

• Guldal:

Jus gáibádus ollašuvvá, de boares Buolbmát gielda šattašii sierra hálddašanguovlun, mii lea badjel bealli Deanu gieldda viidodagas.

– Guovllu olbmuin lea buoret gelbbolašvuohta go Finnmárkkuopmodagas – FeFo:s hálddašit guovllu jávrriid ja eatnamiid ja daid riggodagaid, čilge Trosten.

– Dovdet maid luondu gierdá

Mii deaivvadat suinna Lišmmajávrri alde boares Buolbmát gielddas gos su máttut don doložis leat viežžan luondduriggodagaid.

– Báikki olbmot dovdet dán jávrri dego iežas buksalupma, ja dihtet juohke gođđosaji, gosa suohpput sáimmaid, goas galgá bivdit ja man ollu, akkástálla Trosten, ja lasihastá:

– Seamma gelbbolašvuohta lea maid rievssatbivddus, ealgabivddus ja eará meahccegeavaheamis. Guovllu olbmot dihtet millimehtera ala maid luondu gierdá ja ii gierdda. Dat lea leamaš áiggiid čađa vuođđun guovllu luondduhálddašeamis, ákkastallá Trosten.

Unjárgga duopmu lea movttiidahttán

Badje-Deanu Siida lea logi jagi ráhkkanan ášši. Meahcceduopmostuolu duopmu mii addá Unjárgga gilisearvái hálddašan- ja geavahanvuoigatvuođa lagaš luondduriggodagaide, lea vel eambbo movttiidahttán bargat áššiin.

Maiddái Ávžži gilisearvi Guovdageainnus árvvoštallá dál ohcat oamastan- ja hálddašanrievtti lagasguovlluide.

– Unjárgga duopmu lea hui čielga mihttu midjiide ja fertet oahppat das mo sáhttá dahkat, vástida Ávžži gilisearvvi jođiheaddji Klemet Klemetsen, ja čájeha guovllu.

– Dán vuomis leat hui buori ealga- ja rievssatbivdobáikkit, luomejeakkit ja guollejávrrit, čilge Klemetsen.

Váruha juohkit Finnmárkku

Deanu sátnejođiheaddji Frank Martin Ingilæ váruha ásaheames olu sierralágan hálddašanguovlluid Finnmárkui.

– Mun garrasit ávžžuhan Finnmárkkuopmodaga guoddalit Meahcceduopmostuolu duomu Alimusriektái, go duomus leat nu stuorra prinsihpalaš váikkuhusat Finnmárkku álbmogii, lohká Ingilæ.

– Mas don balat?

– Balan olu sierralágan hálddašanguovlluid dagahit ahte álget cakkadit olggobeale olbmuid ávkkástallamis luondduriggodagain nu movt dássážii leat beassan, vástida Ingilæ.

FeFo árvvoštallá guoddalit

FeFo-direktevrra Jan Olli ii sáhte vuos čielgasit vástidit ahte áigot go guoddalit duomu nie movt Deanu sátnejođiheaddji ávžžuha.

– Muhto jus duomus leat nu stuorra váikkuhusat Finnmárkku álbmogii ja jus gávdno juridihkalaš vuođđu, de sáhttit árvvoštallat guoddalit duomu, vástida Olli.

FeFo stivrra dat galgá 24. beaivve dán mánus mearridit maid barget áššiin.

• Geahča ja guldal: