– Finnmárkulaččat leat buktán oaivilis. Dá lea fámolaš diehtu maid Erna Solberg ferte guldalit, dadjá fylkkasátnejođiheaddji Ragnhild Vassvik (Bb) fylkkadikki sárdnestuolus.
Stuorra eanetlohku Finnmárkkus, olles 87 proseanta, jienastedje ahte eai dáhto fylkkaovttastusa.
RÁMIS: Fylkkasátnejođiheaddji Ragnhild Vassvik dajai iežat rámis go nu ollosat serve álbmotjienasteapmái.
Foto: SkjermdumpSon maid dadjá ahte son lea erenomáš duhtavaš válgaoassálastimin. Oktiibuot serve 34.860 jienasteaddji ja Finnmárkkus leat 59.625 geain lea jienastanvuoigatvuohta.
Dat dagaha ahte 58 proseanta oassálaste. Mii lea sullii seamma ollu mo mannan fylkkaválggaide.
Vaikko vel buohkat geat eai searvan livččet dadjan jo de livčče lihká buođus šaddan ii.
Álttás maid «ii»
Stuorámus ii-gielda lei Bearalváhki go masá buohkat – 96,7 proseanta jienastedje ii.
Áltá ges lei stuorámus jo-gielda. Doppe jienastedje 32 proseanta jo ovttasteapmái ja 66,9 proseanta fas ii.
Báberjienat lohkkojuvvo maŋŋebárgga. Dain maid lea stuorra ii-eanetlohku. Eanaš oassi jienastedje neahtta bokte.
Jienasteaddji: – Nie lea demokratiija
NRK deaivvai jienasteaddji Ragnhild Nystad Kárášjoga jienastan báikkis vuossárga.
JIENASTEADDJI: Ragnhild Nystad oaivvilda ahte stáhta berre guldalit álbmoga.
Foto: Skjermdump / NRK– Mun doaivvun ahte ministtar guldala bohtosa Finnmárkkus. Go nie lea demokratiija, ja Norgga stáhta berre čuovvulit dan. Mun jáhkán dat lea hui váttis bidjat doaimmaid johtui maid álbmot lea vuostá, dajai Nystad NRK:i.
Dat lei fylkkagielda guhte mearridii lágidit álbmotjienasteami. Mearrádus dahkui maŋŋá go Stuorradiggi ja ráđđehus celkkii ahte Romssa ja Finnmárkku fylkkat galge šaddat ođđa regiovdnan.
