Evttoha ođđa riektegieđahallama Fovsen-áššis

Ovddádusbellodaga ovddeš jođiheaddji, Carl I. Hagen, oaivvilda ahte Norgga Alimusriekti berrešii ođđasit meannudit Fovsen-ášši, maid máttasámi boazodoallit vuite.

Čállosis maid riikaáviisa VG lea almmuhan, jearrá Hagen ahte sáhttá go Alimusriekti leat cealkán boasttu duomu áššis.

Son čállá ahte lea váttis áddet movt Alimusriekti sáhttá gohčodit boazodoalu kultuvran.

«Jáhkan eatnašat leat muinna ovtta oaivilis das ahte boazodoallu lea ealáhus, seamma go burro- , sávza, ja vuoncábiergobuvttadeapmi», čállá Hagen.

Son maid deattuha ahte ii son leat Ovttastuvvan našuvnnaid konvenšuvnnain ja Norgga vuođđolágas gávdnan čállosiid gos deattuhuvvo ahte boazodoallu lea kultuvra ii ge ealáhus.

Hagen mielas lea maid dárbu dárkilat guorahallamiidda das movt bieggaturbiinnaid huksemat boazodoalloeatnamiin duođaid váikkuhit boazodollui.

Beannot jagi dassái celkkii ovttajienalaš alimusriekti ahte bieggaturbiinnat Fovsen njaarke orohagas leat lobi haga huksejuvvon ja rihkkot olmmošvuoigatvuođaid.