Else muitala isidiinnis, Ragnariin, ollu áiggi geavahan dán bargui. Čállosat muitalit mo gielda lea ráhčan heaittihit doaimmaid boaittobealde báikkiin Porsáŋggus. Áviisačállosiid soai čohkkiiga 1991` rájes gitta 2009 rádjai.
Boarrásat bálkestuvvojedje Levdnjii
Áviisat čálle mo gieldda politihkkárat rahče heaittihit Billávuona ássan- ja bálvalusguovddáža gos boarrásat Billávuonas besse orrut ja vel dovdat lagas oktavuođa iežaset báikái. Loahpas de heaittihuvvui ássan- ja bálvalusguovddáš ja de sii gárte fárret Levdnjii. Ii das doarvái, maiddái Solbrått boarrásiidsiidda geahččaledje Porsáŋggu gieldda stivrejeaddjit heaittihit ja dainna sii eai vel leat geargan.
Buozai demeanssain, fertii borrat Vival dálkasa balu vuostá
Else muitala vel mo dat manai go áiggui oažžut su isida, gii buohccái, Helsetunii mii lea Leavnnjas. Su isit, Ragnar, buohcá demeanssain ja dalle go dáhtui veahki oažžut su Levdnjii de rávvii doavttir sutnje addit golbma Vivala jándoris balu vuosttá. Ášši čovdui maŋŋá go áittii mannat áššiin VG áviisii.