– Rievtti mielde Rákkonjárga ii háliidan šat addit eatnamiid maid ieža dárbbašit. Ii sáhte lohkat ahte leat hui duđavaččat, muhto lea kompromissa mainna sii birgejit.
Nie čilge orohaga advokáhta Knut Hurum, dan movt Rákkonjárga jurddaša šiehtadusa birra maid sii leat soahpan Elkem fitnodagain.
Knut Hurum muitala ahte Rákkonjárga mielas ledje váttis ja guhkes šiehtadallamat.
Foto: Erik LieunghBesset viiddidit
Dál beassá Elkem viiddidit iežaset ruvkedoaimma Juovlavuonas Deanus, mii lea leamašan doaimmas 1983 rájes.
Dál dat addá báikkálaččat birrasiid 50 bargosaji, ja ruvkkes buvttaduvvo sullii miljovnna tonna (ms) kvárcasihta jahkásaččat.
Ja dát ođđa šiehtadus maid Elkem lea olahan boazodoaluin dagaha ahte Elkem beassá viiddidit doaimma 15 jagiin.
Ledje háliidan eambbo
Elkem lei ohcan oažžut vel stuorat guovllu ruvkedoibmii, go dan maid ožžo. Sii ledje ohcan beassan viiddidit 4,7 njealjehasmehteriin.
Muhto nu olu eai ožžon. Dál orro šaddame gaskal 3,2 ja 4 njealjehasmehter viiddideapmi.
Beaivválaš jođiheaddji Tom Ivar Utsi lea goitge duhtavaš go leat olahan šiehtadusa boazodoaluin.
– Mii háliideimmet eambbo eatnamiid ja boazodoalu ges háliidii unnit addit. Šiehtadallamiin ferte addit ja váldit, ja mii leat duhtavaččat dainna maid leat olahan, muitala Utsi.
Tom Ivar Utsi sávvá ja jáhkka ahte Elkem bargosajiid dagahit ahte olbmot eai fárre eret Juovlavuonas.
Foto: Piera Balto / NRKLei guhka eahpesihkarvuohta movt ruvkii boahtteáigi livččii Deanus, jus Elkem ii livččii olahan šiehtadusa boazodoaluin.
– Ii kvartsihtta gal šatta ođđasis, nu ahte de leimmet fertet fárret eará báikái. Muhto dát šiehtadus nanne dálá bargosajiid ja guhkida doaimma min ruvkkes, čilge Tom Ivar Utsi.
Sátnejođiheaddji duhtavaš
Deanu sátnejođiheaddji, Jon Erland Balto (Gb), lea duhtavaš go bealit leat soabadan. Son deattuha ahte sihke boazodoallu ja Elkem ruvkii lea mávssolaš Deanu servodahkii.
– Hui dehálaš ahte diekkár guokte stuora aktevra sáhttet šiehtadit. Dát čájeha goappašagain lea leamašan áigumuš šaddat ovtta oaivilii.
– Manne lea Elkem ruvkii nu mávssolaš Detnui?
– Dat lea stuora bargosadji, ja minerálaid geavahit miehtá máilmmi. Elkem lea guhká leamašan oassi Deanu servodagas.
Sátnejođiheaddji lea ilus go bargosajiid Juovlavuonas eai heaittihuvvo.
Foto: Dan Robert Larsen / NRKRákkonjárgga orohaga advokáhta Knut Hurum muitala ahte orohat balai molssaeavttus.
– Jus boazodoallu ii livččii dahkat šiehtadusa, de lei Elkem sáhttit geahččalit eará ládje oažžut daid eatnamiid. Ja ballu de lei ahte ožžot olles dan bihttá maid ledje ohcan.
Elkem álgá viiddidan bargguin boahtte jagi.
Geahča TV-ášši:
