Nuorat miehtá Sámi deaivvadedje inuihta nuoraiguin Nuukas, Ruonáeatnamis, «Naapitta-let’s meet» prošeavtta oktavuođas, čakčamánu 31. beaivvi borgemánu 3. beaivái.
Davviriikkalaš eamiálbmogat leat guhká ovttasbargan politihkalaš áššiin. Muhto dán deaivvadeamis ii lean politihkka vuođus.
Elle Rávdná Näkkäläjärvi mielas lei dat hui buorre.
– Ožžon hui ruovttudovddu, ja mis lei hui lunddolaš gaskavuohta.
– Lei hui dálkkodeaddji beassat deaivvadit ja oahpásmuvvat eará eamiálbmotnuoraiguin, go mii muđui leat eanaš vuogádagain eanaš dáčča nuorat.
Deaivvadeapmi lei dan mađe mávssolaš sidjiide ahte ráhkadedje Snapchat-joavkku gos maid eará eamiálbmotnuorat besset nannet searvevuođa.
– Mii han leimmet dušše moattis doppe. Snapchat-joavku lea okta diein vugiin mo sáhttit geahččalit gaskka unnidit. Min olbmát besset maiddái oahpásmuvvat singuin ja veahá oktavuođaid čatnat.
Bovdejuvvui
Kátjá Rávdná Broch Einebakken lea okta dain guhte lea bovdejuvvon Snapchat-jovkui ja su mielas lea somá oaidnit mo Ruonáeatnamis ellet ja maiddái beassat oaidnit daid ovttaláganvuođaid ja erohusaid.
– Mun lean álo dovdan ahte árktalaš álgoálbmogiin lea juoga erenoamáš, ja mus lea álo leamaš hállu oahppat eanet ja oažžut oktavuođa eará álgoálbmogiiguin, maiddái inuihtaiguin, lohká son.
Ođđa áigodat
Sámediggeráđđi Maja Kristine Jåma rámida nuoraid gulahallanvuogi. Son jáhkká otná teknologiijas leat stuorra mearkkašupmi eamiálbmogiid ovttasbargui.
– Mii eallit ođđa áigodagas, ja mis lea teknologiija mii veahkeha min doallat oktavuođa eará eamiálbmogiiguin. Dál leat eanet vejolašvuođat čatnat oktavuođaid ja gulahallat, nu go nuorat dahket dán Snapchat-joavkku bokte, ovdamearkka dihte.
Jåma oaivvilda ahte buorre ovttasbargu lea dehálaš go boahtteáiggis jáhkká ahte šaddet vel eanet hástalusat, earret eará dálkkádatrievdademiid geažil.
– Boahttevaš eamiálbmotjođiheaddjit soitet leat jo oahpásmuvvan, ja dat han álkidahttá min ovttasbarggu, lasiha son.
Guokte mánu geahčen lágiduvvo «Naapitta-let’s meet»-prošeavtta váldodáhpáhus Oslos, ja lagabui 150 árktalaš nuora servet dasa.
Elle Rávdná illuda fas deaivvadit iežas inuihtta verddiiguin.
– Mun dieđán ahte jos manan fas Nuuki, de mun sáhtán singuin váldit oktavuođa. Jos bohtet Sápmái de sii maid sáhttet minguin váldit oktavuođa, dadjá son.