Čálliidlágádusa doaimmaheaddji John Trygve Solbakk lohká ahte sii gal atnet árvvus maiddái daid guokte eará sámegielaid eaige dušše davvisámegiela.
– Mis leat golbma sámegiela ja áigumuš livččii juohke dássái ja juohke fágii ovtta girjji ráhkadit.
Solbakk lohká ahte vihtta miljovnna lea unnán ruhta, iige son gátte das leat makkárge áktánas váikkuhusaid.
Son lohká maiddái ahte boađášedje várra dušše moadde lassi oahpponeavvu.
– Sámedikkis lea alddis vuoruhanlistu. Juohke jagi almmuhit dan listtu golmma sámegillii, muhto juohke jagi čájehuvvo ahte eai sii oaččo goalmmádas oasige ollašuhttit maid sii áiggošedje dainna juolludemiin, mii jahkásaččat leamaš oahpponeavvuide.
Solbakk deattuha ahte Norggabeale Sámis leat golbma sámegiela, ja galggašii fágaplánaid ođasmahttit ja maiddái girjjiid.
Illustrašuvdna: Eai soaitte ihtit mearehis ollu ođđa oahpponeavvut dáinna juolludemiin.
Foto: Siv Eli Vuolab / NRK– Mun in oainne viđa miljovnnas maidige eará go, ahte sáhttet media bokte dahje jienasteaddjiide rábmot ahte dál leat mii nagodan oažžut vihtta miljovnna, ja dan gal eai dárbbaš oppa rábmotge, go diehtit makkár duohtadilli mis otne lea.
Sámediggi lea ožžon oktiibuot 11 miljovnna ruvnnu lasi sámi oahpponeavvuide 2023:s. Sii eai lean vuordán oažžut lasi ođasmahttojuvvon bušeahtas.
– Man guhká áigu Sámediggi hálddašit dán geafivuođa?
Solbakk ávžžuha Sámedikki bidjat eret ovddasvástádusa oahpponeavvuide.
– Man guhká áigu Sámediggi duođaid hálddašit dán geafivuođa? Manne eai bija eret dan ovddasvástádusa? jearrala Solbakk.
Son lohká maiddái ahte boađášii várra buoret ruhtajuolludeapmi sámi oahpponeavvuide jus Oahpahusdepartemeanta stivrešii ruhtadeami.
– Mii eat dieđe eará go moaitit Sámedikki, go ii nagot ollašuhttit dan maid galggašii, Sámediggi berrešii eret bidjat dan ovddasvástádusa.
– Ii leat dat ahte Sámediggi ii máhte hálddašit ruđaid
UNNÁN RUHTA: Sámediggeráđđi Runar Myrnes Balto lohká čuolbman áššis lea, unnán ruhta.
Foto: Hans Ludvig Andreassen / NRKSámediggeráđđi Runar Myrnes Balto lohká Sámediggi, mii lea sámiidválljen orgána, hálddaša oahpponeavvoruđaid buoremusat.
– Dat mii lea šállošahtti ja hástalus lea ahte Sámediggi oažžu menddo unnán ruđa eiseválddiin sámi oahpponeavvuide.
Balto čilge ahte ráđđehus válddii Sámedikki bušeahtas eret 15 miljovnna, ja juolludedje dušše 6 miljovnna, muhto ahte dál sii leat ožžon 5 miljovnna lasi.
– Muhto oktiibuot de boahtá menddo unnán ruhta sámi oahpponeavvuide. Ja dat lea dat mii lea hástalussan, ii dat ahte Sámediggi ii máhte hálddašit dáid oahpponeavvoruđaid, muitala Myrnes Balto.
Balto lohká maiddái iežaset Sámedikkis vuoruhit julev- ja máttasámegiel oahpponeavvuid.
– Mii gal vuoruhit maiddái julev- ja máttasámegiel oahpponeavvuid nu bures go vejolaš daid rámmaid siskkabealde, mat mis leat.
Balto loahpaha ahte sii leat olles áigge bargamin buoridit iežaset ortnegiid.
