Juovlamánu álggus álggahii Sámi Nationála Gealboguovddáža (SANKS) ja Romssa Universiteahta - Árktalaš Universiteahta doavttirgráda studeanta, Jon Petter Stoor, ođđa dutkanprošeavtta, mas áigu dutkat manin nu ollu nuorra sápmelačča, ja earenoamážiid boazodoallonuora válljejit iešsorbmema ovdalii veahki.
Ollu nuoraid gaskkas
Jon Petter Stoor dadjá ahte dát dađibahábut lea váttisvuohta mii lea buot sápmelaččaid gaskkas, muhto ahte dat lea stuorimus nuorra boazosápmelaččaid gaskkas. Dat leage duogáš dasa go sii leat álggahan dán dutkanprošeavtta, dadjá Stoor.
– Lea stuorra váttisvuohta olles sámis go olmmošlogu hárrái, de leat ollugat geat válljejit iešsorbmema áidna čoavddusin váttisvuođaide. Dát lea earenoamáš stuora váttisvuohta nuorra sámiid gaskkas ja ruoŧa bealde ja earenoamážit boazodoallonuoraid gaskkas, dadjá Jon Petter Stoor.
Rahčet iešsorbmenjurdagiiguin
Jon Petter Stoor dadjá ahte oallugiin, geain leat man nu lágan váttisvuođat maid ieža eai oro nagodeamen čoavdit, ja dávjá dat lea vuolggahan iešsorbmenjurdagiid. Lea earenoamážiid maŋimus njealji jagi dáhpáhusat mat leat dagahan ahte sus čuožžilii miella ja áigumuš dán váttisvuođa eanet dutkat. Sus lea sierra sámi referánsajoavku geat sutnje leat doarjjan go dáinna áššiin bargá, dadjá Stoor.
Buoremus lea jearrat
‒ Jus lea nu ahte geasge lea ballu dahje navdá nuppi olbmos leamen iešsorbmenjurdagat, de lea buorre jus dan olbmos njuolgut jearrá ahte leatgo sus dákkár jurdagat. Muhto dalle ferte maiddái gearggus duste vástádusaid máid de oažžu, dadjá Jon Petter Stoor.
Jon Petter Stoor lohka bargamin dutkkalmasain gitta jagi 2019 skábmamánu rádjai.