– Dat lea hirbmat vahát, go dat han čuohcá sámi pasientii. Nu cealká Sámi doavttirsearvvi jođiheaddji Máret Lájlá Nedrejord.
Dál dáhttu Sámi doavttirsearvi rievdadit dálá ortnega.
Sámi klinihkas lea ovddasvástádus fállát dearvvašvuođabálvalusaid olles sámi álbmogii. Dálá ortnegiin lea klinihkka guovllu buohcceviesu vuolde, ja dat váikkuha earret eará ruhtageavaheapmái.
– Finnmárkku buohcceviessu (Finnmarkssykehuset) lea hirbmat váttis ruđalaš dilis. Sámi klinihkas ges lea buorre ruhtadilli leamaš guokte maŋimuš jagi. Muhto badjelbáza geavahuvvo gokčat dan vuolláibáhcaga mii Finnmárkku buohcceviesus lea. Leago dát riekta? imašta Nedrejord.
Árvalit ođđa vuogádaga
Dálá ortnegiin ii juolo ruhta Sámi klinihka bálvalusaid nannemii ja bargiid rekruteremii. Dakkár bargu mii doavttersearvvi mielas áibbas dárbbašlaš ja dehálaš.
– Lea váttis diehtit leago ruđain sáhka, muhto sámi máhttu ferte aŋkke vuhtiiváldojuvvot. Nu go dille lea dál, de eai deattut sámi kompetánsa go galget virgádit ođđa bargiid.
Searvi lea lokten ovdán čállosa mas arvalit movt sáhttá rievdadit ortnega.
– Buoremus livččii beassat Davvi Dearvvašvuođa (Helse Nord) vuollái. Ahte Sámi klinihkka organiserejuvvo alibut dássái, ja oažžu sierra stivra ja bušeahta. De beassá Sámi klinihkka ieš mearridit mo vuoruha sámi bálvalusaid, ja dan mii lea buoremus sámi pasientii.
Sámediggi šálloša
Sámediggeráđđi Runar Myrnes Balto (NSR) lea duhtameahttun das mo Sámi klinihkka lea organiserejuvvon dál, ja dadjá iežas áigut čuovvolit dán ášši.
– Lea šállošahtti nu mo dilli lea dál. Sámediggeráđi bealis leat mii dáhtton čoahkkima dearvvašvuođaministariin, Ingvild Kjerkol (Ap). Mun áiggun doppe loktet dán ášši, ja arvalit ahte Sámi klinihkka berre eará ládje organiserejuvvot. Mus lea doaivva ahte son ipmirda dán, dan dihte go dárbu rievdadussii lea hui stuoris.
Ii rievdat dálá ortnega
Dearvvašvuođadepartemeanta stáhtačálli Karl Kristian Bekeng (Ap) lea lohkan Sámi doavttirsearvvi čállosa, muhto ii daja dálá ortnega rievdat.
– Mii leat ožžon reivve ja áigut čuovvulit dáid hástalusaid maid searvi buktá ovdán. Muhto justa nu go dilli lea dál, de eat rievdadit maide dálá ortnegis.