Ballá buohccát go geainnut leat gitta dálkki geažil

Sis-finnmárkulaččat ellet vártnuhis dilis, go heajos dálkki geažil sáhttá leat veadjemeahttun beassat buohccivissui.

Inger Elle Gaup

DÁRBU HÁRJEHALLAT: Inger Elle Gaup lea kolsabuohcci ja danin son láve soppiiguin vázzit vai bissu dearvvašin.

Foto: Johan Ánte Utsi / NRK

Les på norsk: Inger Elle frykter for livet på grunn av stengte vinterveier

Lagabui 60- jahkásaš Inger Elle Gaup lea kolsa, ja son lea máŋgii goasii hávkan dán geahppesdávdda geažil.

– Go buohccán, de láve šaddat nu lossat vuoiŋŋat ahte orun dego buvvome, muitala son.

Inger Elle lea máŋgii sáddejuvvon sihke ambulánssain alit čuovggaiguin ja Seaking helikopteriin Guovdageainnus. Su leat dolvon sihke buohccivissui Hámmerfestii ja Romsii.

Dán rádjai son lea ožžon veahki juohke háve, muhto dál son ballá eambbo go goasse ovdal.

Jus buohccá go geainnut leat gitta ja girdit eai sáhte girdit, de sáhttá leat dát heaggaváralaš sutnje.

– Go leat vuoigŋanváttisvuođat de leat minuhtat maid divrasat, dadjá son.

GUHKKI BUOHCCIVISSUI: Guovdageainnus Hámmerfeasta buohccivissui lea 27 miilla.

Geainnut gitta 34 geardde

Dán dálvve lea leamaš erenoamáš olu heittot dálki ja olu muohta Davvi-Norggas.

Sennalandet

STOARMA: Dákkár dálkki čađa sáhttá šáddatjá vuodjit go lea jođus buohccivissui Hámmerfestii.

Foto: Jan Harald Tomassen / NRK

E6-geaidnu Hámmerfestii Suoidneleavšši bokte lea leamaš gitta 34 geardde golggotmánu vuosttáš beaivvi rájes gitta njukčamánu 12. beaivvi ráddjái, nu čájehit logut Stáda geaidnodoaimmahagas.

– Dat lea hirbmat issoras midjiide gullat dan. Mii ballát juo muđui, ja de gullat diekkáriid, de šaddá earenoamáš lossat, dadjá Inger Elle.

Sáddejuvvui buohccivissui, muhto fertejedje jorgalit

E6 Álttás ja Romsii lea maid dávjá gitta Návuonvári badjel. Dál go Suoma rádji maid lea gitta koronavirusa geažil, de ii beasa Romsii eará go girdin ja helikopteriin jus E6 lea gitta.

Kart over stengte veier

GEAINNUT GITTA: Máŋgga sájis Davv-Norggas leat geainnut gitta dálki geažil.

Foto: Statens vegvesen

Dán vásiheigga vuoras govdageainnu- párra geat leigga jođus Romssa buohccivissui mannan vahkkoloahpa.

Isit galggai čuohpadussii, ja soai eaba duosttan váldit girdi go balaiga koronavirusa sudnuide njoammut girdis.

Soai de mátkkošteaigga droššiin, muhto sii šadde jorggihit go luodda lei vuohon gitta Návuonvári badjel.

Dálki isolere Finnmárkku

Guovdageainno sátnejođiheaddji Hans Issat Olsen ipmirda go olbmot ballet buohccát, go Sis-Finnmárkkus lea guhkes gaskka lagamus buohccivissui.

Olsen dáhkida ahte suohkanis lea buorre heahtegearggusvuohta, muhto váttisvuohta čuožžila jus buohcci olmmoš dárbbaša sáddejuvvot buohccivissui olggobeallai suohkanráji.

Hans Isak Olsen

ÁLTÁI BUOHCCIVIESU: Guovdageainnu sátnejođiheaddji Hans Isak Olsen mielas lea dat áidná čoavddus váttisvuhtii hukset Áltái buohcciviesu.

Foto: Johan Ánte Utsi / NRK

– Go lea dálki, de leat visot luottat gitta. Mii isolerejuvvot Guovdageidnui. Mii eat beasa gosage, eat guđe ge guvlui, dadjá sátnejođiheaddji.

Guhka lea leamaš nággu dan alde galggašiigo Áltái maid ásahuvvot buohcciviessu.

Dás ii leat goit vuos šaddan mihkkege. Nu gártet sis-finnmárkulaččat beanta veahki haga jus fal lea dálki.

– Jus olmmoš dáppe hejot buohccá, de mis leat stuora váttisvuođat beassat báikái gos oažžu veahki, lohká Olsen.

Ii sáhte veahkehit

Johtolatdepartemeantta stáhtačálli Ingelin Noresjø, muittuha ahte dán dálvve lea leamaš erenoamáš ollu heajos dálki mii lea buktán stuora hástalusaid johtolahkii.

Ingelin Noresjø på KrF-landsmøte 2019

RÁMIDA: Ingelin Noresjø rámida muohtaboltunbiila vuddjiid geat dahket nu bures go sáhttet doallat luottaid rabas Finnmárkkus.

Foto: Carina Johansen / NTB Scanpix

– Mun ipmirdan ahte olbmot Sis-Finnmárkkus dovdet iežaset isolerejuvvon go luttat leat gitta ja lea heajos dálki. Finnmárkkus leat guhkes gaskat ja olu dálki, čállá son NRK:ii.

Son ii sáhte lohpidit eambbo resurssaid ja iige son jáhke dat veahkehivččii doallat luottaid rabas, go fylkkas lea dávjá heajos dálki.

– Boaittobeal báikkiin lea duođai várálaš buohcat. Min heakkas ii oro seamma árvu go sin geat orrot lulli-Norggas, lohká Inger Elle Gaup.