DEATNU: Guokte beatnaga balahuvvoba leat buollán vissui

Ásodat mii bulii gutnan Luossanjárggas Deanu gielddas otne beaivit, lei Eivind Guttorma viellja ásodat maid lei láigohan earáide. Ásodagas eai lean olbmot go buolligođii.

– Politiijat ožžo buollindieđu kvártaváile ovttas odne beaivet, muitala Finnmárkku politiijaguovllu operašunjođiheaddji, Torfinn Halvari.

Dát guokte viesu leigga goalustuvvon oktii njeallje mehter guhkkosaš govddiin.

Eivind lei káfestallamin go káfestallanguossin fuomášeigga dola leavgimin.

– Rávádin buollinčáskkadanávdnasa mielde ja viehkalin čáskadit dola. Dihten viesus ledje guokte beatnaga, ja geahččaleimme gádjut. Muhto go leahkasteimme uvssa, de šávihii nu ollu suovva ahte fertiime vuollánit, son muitala.

Rápmo ovttasbarggu Ohcejogain

Go riŋgii heahtenummirii, de ii gollan guhkes áigi ovdal go Ohcejoga, ránnjáriikka guokte buollinčáskadanbiilla leigga sajis.

– Mu mielas lea nana buorre go Deanu gielddas lea ovttasbargu Ohcejoga dollačáskadeddjiin. Dalá maŋŋá go dat guokte biilla leigga joavdan Ohcejogas, de bođii vel goalmmát biilla Suomas, namma lassii Njuorggámis. Sullii vihtta minuhta maŋŋá jovde vel Deanušaldi guokte čáskadanbiilla, Eivind rápmo.

Dán ovttasbarggu haga ii jáhke ahte buollinčáskadeaddjit livčče nagodan gádjut su ásodaga.

Balle buollima sáhttit viidut

Politiijat navde guhká ahte buollin sáhtii viidut maiddái ránnjá-ásodahkki, muhto nu lihkus ii geavvan.

Viesus eai lean olbmot go dat buolligođii. Muhto guktot beatnaga mat leigga viesus navdoba leat buollán vissui.

Nubbi buollin

Ii leat vuosttaš geardde ahte Guttorm-bearaš lea fáhtehallan buollinlihkohisvuhtii. Sullii 20 jagi áigi bullii bearašdállu gutnan. Moatti jagi maŋŋá sii huksejedje guokte ásodaga seamma sadjái. Ja dál dat lea nubbi das fas buollán.

– Lea issoras jurddašit dan birra, lohká Eivind.

Politiijat eai vuos dieđe mii lea sivva buollimii, ja áigot guorahallat ášši dábálaš láhkai.