NRK Meny
Normal

Dárkkistit ealgabivdiid

Kárášjogas ja Guovdageainnus álgá odne ealgabivdu, ja máŋga čuođi bivdi leat bivdoguovlluin. Eiseválddit nannejit dán oktavuođas bearráigeahču.

Elgflokk

Ealgabivdu lea álgán ja nu nannejit maid politiijat ja Stáda Luonddubearráigeahčču bearráigeahču bivdoguovlluin.

Foto: Kallestad, Gorm / SCANPIX

– Politiijat áigot čađahit dárkkistemiid ovttas Stáda Luonddubearráigeahčuin, cealká Boazopoliitijaid doaibmi jođiheaddji, Inger Anita Øvregård preassadieđáhusas.

Olu bivdoguovllut leat guhkkin eret biillaluottain, ja danne fertejit olu bivdit vuoji dohko johtit.

Isket sierralobiid

Inger Anita Øvregård

Boazopoliitijaid doaibmi jođiheaddji, Inger Anita Øvregård, rávve ealgabivdiid dárkkistit ahte sis leat buot duođaštusat mat gáibiduvvojit bivdui.

Foto: Åse Pulk/NRK

Stáda luonddubearráigeahčču ja politiijat áigot earret eará dárkkistit čuvvot go buot bivdit njuolggadusaid fuođđolágas, mohtorjohtolatlágas ja vearjolágas.

Dasa lassin áigot sii iskat lea go vuoddjin sierralobit vuodjimii olggobealde lobálaš bievlavuodjenluottaid.

Bivdit galget maid bures páhkket bissu, nu ahte dat ii leat menddo sadjosis vuojedettiin bivdobáikái.

Čorget gohttenbáikkiid

Politiijat isket maid ahte bivdit leat máksán bivdindivada, ja ahte bissokoarta lea njuolggadusaid mielde.

– Dieđusge sii maid dárkkistit ahte bivdit leat čađahan báhčingeahččaleami, deattuha Øvregård, iežas diehtojuohkinčállosis mediaide.

Bivdit fertejit maid geavahit dohkkehuvvon beatnagiid mat galget guorrat.

Politiijat muittuhit vel ahte bivdit galget gohttenbáikki čorget go bivdu nohká ja bivdit galget váldit mielde buot ruskkaid.