Čavčča rájes ii leat šat lohppii bivdit ealggaid Anárjoga Álbmotmeahcis. Rievtti mielde ii leat doppe obanassiige lohppii ealggaid bivdit, muhto Finnmárkku opmodat dahje FeFo lea 2003 rájes gitta dássážii sierra lobiin beassan lágidit bivddu dán guovllus. Bivdu lei geahččalanprošeakta, dan olis ahte geahpedit ealgalogu.
FeFo lei ohcan suodjalanmearrádusas sierralobi beassat ain lágidit bivddu 2016s gitta 2018 rádjai, ja lei jurdda lágidit bivddu nu mot dán rádjai leat dahkan.
FeFo lea bivdoohcamušastis deattuhan ahte ealgabivdu váikkuhivččii ealgalohkui Álbmotmeahcis ja Bassevuovddis, ja dáinna lágiin maid gáhttešii ealggaid guohtumis ja goarideames beziid. Ja maiddái ahte de beasašedje eambbosat ealgabivdui.
Goddo unnán ja ballet bievlavuodjimis
Finnmárkku Fylkkamánni Birasgáhttenossodat dat dál bisseha bivddu, sivas go ballet luonddu duolmmástuvvat, bievlavuodjima lassánit jus fal addo sierralohpi dán bivdui.
Lea maid čájehuvvon ahte goddojuvvo beare unnán ealga dán guovllus bivddu áigge, birrasiid 9-13 ealli jahkásaččat, ja dat lea beare unnán.
Fylkkamánni árvvoštallá váttisin čuollat dan beali ahte 10-20 ealgga lea dárbbašlaš goddit jahkái bisuhan dihtii meahcceeallilogu dáfus dássedeattu, erenoamážit go ovddežis lea mihttun leamaš goddit 70 ealgga jahkái.
Fylkkamánni maid čállá ahte Statskog dieđuid miel, de bivdu nu mot dán rádjai lea čađahuvvon, mielddisbuktá bievlavuodjima sihke olggobealde ja siskkobealde Álbmotmeahci, ja dan ii dáhtošii fylkkamánni.
Fylkkamánni dieđiha ahte FeFos lea dál golbma vahku guoddalit ášši Birasdirektoráhtii.