Dálkudiddjehásstalusá budsjæhttaj
Sosialistalasj gåråbelludagá suohkanstivraájras Divtasvuonan, John Gunnar Skogvold oajvvat dálkudiddjekåntåvrrå Ájluovtan viertti bissot boahtte gålmmå jage, ja Divtasvuona suohkan hiejtet sjiehtadusáv Stájgo ja Hábmera suohkanij mij guosská dálkudiddjeváksjomav Strávnjunján. Skogvold oajvvat farra, aktan Hábmera suohkanijn, dálkudiddjeváksjomav Ájluoktaj biedjat.
Skogvold tjuottjot ij la dåhkkidahtte Ájluovtas dálkudiddjekåntåvrrå gáhtu dajna gå Ájluovtan ålos årru ja gå la aj fabrihkka ja boarrásij viesso danna, tjállá Skogvold girjen suohkanoajvváj ja suohkanstivrraj. Dájt oajvvadusájt de Skogvold åvddånbukta budsjæhttatjåhkanimen Divtasvuona suohkansitivran boahtte vahko.