Teáhterbihttá váldá ovdan riiddu mii badjána go minerálaindustriija álggahuvvo muitala bihtá čálli ja neavttár Sven Henriksen. Son čilge ná manne bihttá oaččui namma "Mávssaheapmi".
– Dadjo ahte luondu mávssaha, go olbmot eai gudnejahte dan. Jurddašan maid ahte álgoálbmogat fertejit dadjat ahte dál lea doarvái ja čájehit vuostehágu.
Son muitala ahte bihttá lea fiktiiva muitalus guovtti nuorra nieidda birra geat vuosttildeaba mearrádusaid álggahit ruvkedoaimmaid sápmái.
Ieš mielde neaktimin
Golbma jagi dassái Beaivváš Sámi Našunálateáhteris jerre iigo son sáhtašii čállit juoidá teáhterii. Son válljii čállit muhttin dakkár áššis mii lea áigeguovdil ja su jurdagiidda bohte luondduriggodagat ja álgoálbmogat.
Dan lassin ahte Sven Henriksen lea čállán čájálmasa, de lea son maiddái neavttár das. Teáhterhoavda Rolf Degerlund guhte bagadallá bihtá, jearai iigo Henriksen sáhtašii maid neaktit čájálmasas.
– Lea hui somá, go in leat 13 jahkái neaktán Beaivváš teáhteris, dadjá Henriksen.
Sávvá bohciidahttit digaštallama
Čájálmasa vuosttaščájáhus lea golggotmánu 7. beaivve Guovdageainnus ja bihtáin johttet miehtá Sámi, sihke Norgga, Suoma ja Ruoŧa bealde.
– Illudan sakka. Jáhkkan mii leat ráhkadeamen juoidá mii šaddá hui fiinnis, ođđaáigásaš ja hui earálágan. Bihttá várra bohciidahttá digaštallama, dan ain juo sávan, lohká Henriksen. Buot guovlluin leat olbmot geat vuostálastet ja maiddái dorjot
ruvkedoaimmaid ja son sávvá olbmuide badjánit gažaldaga dan birra, mii dáhpáhuvvá dan maŋŋá ja mii midjiide báhccá ruvkedoaimmaid maŋŋá.