Dáhpe nåhkåm – HellmoCupa njuolgadusájt rievddá

HellmoCup le jáhkásasj tjjektamgilpostallam mij Måsken, Divtasvuonan ásadalladuvvá. Tjiektjama li 1972 rájes vihpam, ja moaddásij la dát giese ájnnasamos dáhpádus.

Gitta dálátji li dåssju bájkálasj juohkusa oassálasstám, ma julevsáme årromguovlojda Divtasvuonan le tjanádum. Dán jage li njuolgadusá rievddam, vaj gájkan le máhttelisvuohta boahtet tjievtjatjit.

• Lågå aj: Nils-Heika (25) giesseårrudahkaj guhkat

Gæhttjalim-årnik

Muddo lij oabme njuolgadusájt rievddat, javllá Elena Paulsen, stivrrajådediddje DoajmmaSiebrre Julevsámen.

– Tsuojggidusájt njuolgadusá birra lip oadtjum. Guokta juohkusa ma juohkka jage le maŋen læhkám e desti juohkusav nagá mannuj biedjat.

Dat sihtá javllat gájka dal máhtti tjiektjamijda diededit. Jus la 15 jagák jali vuorrasabbo, de la ájnna gájbbádusáv dævddám.

– Gæhttjalip dáv dán jage, ja de dágástallap dan birra gå tjiektjama li nåhkåm. Jus la doajmmam jali ij la, joarkká Paulsen.

– Jáhkáv tjiektam rievddadimijt dárbaj

Preben Johnsen guhti Måsken årru doajvvu ådå njuolgadusá dahka vaj HellmoCupa ienep ulmutjijt tjoahkki.

– Jáhkáv rievddadime båhtusijt buktá. Gå ietjá ulmutja båhti, de suohttasabbo sjaddá.

Johnsen le Måske-juohkusin tjiektjam, ja sihtá tjiektjamijda dán jage aj sæbrrat.

Dijmmá sæbrrin guhtta ålmmåjuohkusa. Sisgiehtje, Soahkeluokta, Rudnávuodna, Davvegiehtje/Tjieloabme ja Måsske. Guokta nissunjuohkusa lidjin, Sisgiehtje ja Måsske. Duodden de sulle 50 máná tjiektjamskåvllåj sæbrrin.

HellmoCup snjilltjamáno 22. ja 23. biejve ásaduvvá, ja julevsáme vahkov låhpat, tjállá DoajmmaSiebrre Julevsábme ietjas næhttabielijn.

• Lågå aj: Danen Divtasvuonan dá giese (2014)