Nie dat girječálli June Sommer Strask árvaladdá go jearan manne dákkáraš muitalusa lea čállán. Iežas muitala leat sámisogalažžan gii easka ollesolbmo agis fuomášii ahte ii leat seiva rivgu, vaikke hállá dárogiela. Su máttut ledje beare mearredan heaitit hállamis sámegiela dalle dan garraseamos dáruidahttima áigge. Dál illuda go lea fuomášan iežas sámi vuođa.
Giegačivga Filius/Gjøkungen Filius čálus riegádii mánáidruovttus
Ii son ieš gal leat mánáidruoktománná, muhto son orui Gohpi mánáidruovttu gárdimis dalle go barggai oahpaheaddjin Gohpis Fielvuonas. Dán dálus son morihii muhtin iđđeda ja beare álggii čállit. Son čálii ahte čálii, iiba nagadange bisánit ovdal go muitalus lei ollislaš.
– Soaitá mánáidruovttu seinniin lean makkárnu dáhttu ahte son galggai čállit dán girjji. Go ii hal giegačivggasge leat ruoktu, eai giegat beroš čivggaineaset. Eaige dat hága alcceseaset beasi, dat monnejit eará lottiid besiide.
Eai mánáidruoktománátge oro vánhemiiddiset luhtte, siige šaddet bajás seammaláhkai go giegat, vánhemiiddiset haga. Danne son várra čálii dán muitalusa, lohká June Sommer Strask.
Giegačivga Filius lea finadan Ruoššas ovdalgo girjin beasai
Ođđa mánáidgirji maid June Sommer Strask lea čállán. Iđut-lágádus lea dan álmmustahttán ja Sámediggi ges dorjon dan ruđalaččat.
Foto: Iđut-lágádusFilius lea beaggán olu ovdalgo deaddiluvvui girjin. Muitalus lea leamaš mielde Finnmárkku skuvllakonsearttain, ja lea maid ruoššagillii čájehuvvon mánáide Murmánskkas.
Dál lea Iđut-lágádus almmustahttán muitalusa girjin, das lea teaksta dávvisámegillii ja dárogillii. Máret Sárá lea jorgalan teavstta davvisámegillii, Sissel Horndal lea njuohtan govaid girjái, ja Sámediggi lea dorjon girjji almmustahttima ruđalaččat.
