Bossusafári-fanas botkii čorraga mearas

Veaigin mannan sotnabeaivvi vuojahedje ártnihasat čorraga Gávvir-sullos Márnuori rastá nannámii.

Go čora lei gasku nuori, de sii fuomášedje fatnasa vuodjime čorraga guvlui.

Sii geahččaledje sihke biila- ja njealjejuvllatsihkkel- ja gárdečuovggaiguin fuomášuhttit fanaskapteainna.

– Mii geahččaleimmet čuovggaiguin šleađgut nu ahte fanas ii vuoje čorraga njeaiga.

Nu dadjet boazosápmelaččat, geat čužžo sullos ja oidne mii dáhpáhuvai.

– Fanas dagahii goasii moivvi go dat šattai njunnoša ja maŋŋoša gaskii, sii muitalit.

Sii oidne maid dakka maŋŋel ahte fatnasis šleađggáhallagohte kámera-blitssat go fanas lei čorraga buohta.

Framtid i Nord-aviisa (ekstern lenke) almmuhii ođđasa vuosttažin.

Orohatovdaolbmo Inger Marie Gaup Eira mielas lei dáhpáhus duođalaš.

– Mii balaimet ahte bohccot jorggihit go leat mearas. Dat sáhttet jorggihit ruovttoluotta ja heavvanit, dadjá son.

Gávvir-suolu lea Ráissa suohkanis ja nuorri lea sullii 900 mehtera govddu.

Garve bohccuid

Bossusafári-fitnodaga Brim Explorer miel-vuođđudeaddji ja teknihkalaš direktevra, Espen Larsen-Hakkebo, muitala ahte sin fanas lei guovtti eará fatnasa maŋábealde. Eaige vávján maide earenoamážiid.

Go fuomášedje čorraga, de sii ovttatmanus vuolidedje leavttu.

– Mii dovddastit ahte leimmet lahka čorraga, dadjá son.

Romssa Brim Explorer -fitnodat fállá mearramátkkiid fatnasiin, mii ii rigere iige nuoskkit, go sis leat hybrida-elektrihkalaš fatnasat.

– Go mii fuomášeimmet čorraga, de mii geahččaleimmet garvit ja váruhit ahte eat muosehuhte bohccuid. Mii bisáneimmet ja geahčaimet go bohccot ollejedje gáddái, dadjá son.

Fanasguossit govvejedje čorraga, ja daid lea fitnodateaiggát juohkán minguin.

Fertii Facebookii čállit go dovddai ahte sii gielistit

Framtid i Nord -aviisii čuoččuha direktevra ahte sii ledje 200 gitta 300 mehtera eret bohccuin, muhto dán imaštallá Ártni orohatovdaolmmoš.

– Diet nuorri lea 900 mehtera ja jus diet lea sullii gasku dáhpáhuvvan. Gos bat de lea leamaš dat fanas? Gáttis? Jearrá Gaup Eira.

Ártni orohatovdaolbmo mielas lei unohas go bossusafári bealis eai áigon álggos muitalit duohtavuođa.

– Diet ii doala deaivása juste man lahka sii ledje, go min boazovázzit han giikanaste ja oidne. Fanas lei nu lahka bohccuid ahte dat measta guoská bohccuide, dadjá son.

Son dovddai ahte kapteaidna ii muital duohtavuođa.

– Mun gullen kapteainnas ahte son geahččala gávdnat ákkaid ahte dát ii lean sin sivva. Eaige sii lean nu lahka. Dalle mun dovden ahte mun ferten Facebookii čállit min iežamet beali, dadjá son.

Son čálii:

Odne mun jurddašan manne bossusafári vujii njuolga čorraga sisa mat ledje vuodjame? Dát dáhpáhuvai odne, go čora vuojai Márnuori. Mis leat namat sihke sutnje gii stivrii fatnasa ja fatnasii.

/

I dag tenker jeg på hvorfor en hvalsafari kjører rett inn i svømmende reinflokk? Dette skjedde i dag da en liten flokk holdte på å svømme over Maursundet. Vi har navn både på skipper og båt.

Áigu oahppat dáhpáhusas

Bossusafári-fitnodaga direktevra Espen Larsen-Hakkebo deattuha ahte sii eai leat mieleavttus maide bargan.

– Mii árvvus atnit boazoealáhusa ja oaivvildit fatnasat galget bissánit go oidnet bohccuid vuodjame mearas. Mii eat vuoje goasse njuolga elliid guvlui. Eatge vuodjel sin guđege guvlui, dadjá son.

Larsen-Hakkebo ii dieđe eará báikkiin máilmmis gos bohccot vudjet sullos nannámii, ja vásáhus lea dieđusge čáppat čalbmái, earenoamážit sin gussiide.

– Mii leat oahppan dáhpáhusas. Dat lei váttis oaidnit geamádahkan ja mii háliidit buoret gulahallama ealáhusain, dadjá son.

Son deattuha vel.

– Mii eat mieleavttus dahkan dan. Mii geahččaleimmet garvit bohccuid vai dat ráfis besse vuodjat gáddái, dadjá son.

Fitnodateaiggát ja Ártni orohaga ovdaolmmoš leaba čielggadan ášši, ja Inger Marie Gaup Eira čálláge dán vel Facebookii.

Mii leat soahpan Brim Exploreriin ahte mii eat sehkket politiijaid áššái, muhto mii soabadit ášši. Son deattuha maid ahte son ii leat geahččaleame fitnodaga nama billistit, muhto čalmmustahttit fáktáid.

/

Vi ble enig med Brim explorer at vi ikke kobler inn politiet i saken., men komme til alminnelig enighet. Det er for øvrig ikke uthengelse av noen, men et faktum.