– Sámi allaskuvla hálddaša foandda ja dáinna rihkkot bealálašvuođa njuolggadusaid, jos skuvlla njunuš maid lea foandda stivrras mielde. Nu lohká Máhttodepartemeantta universitehta ja allaskuvlaossodaga ossodatdirektevra, Rolf L. Larsen.
Larsen lohká šaddat váttisin rektorii, go sus šaddet guokte gahpira oaivvis.
– Norgga lága mielde ii sáhte seammá olmmoš jođihit guokte ásahusa, mat gullet oktii ja mat ná ovttasbarget. Nugo dán áššis mas sámi allaskuvla maid hálddaša Israel Ruong foandda stipeanddaid, čilge Larsen.
Sámi allaskuvlla rektor, Jelena Porsanger dat lea maid jođihan Israel Ruong foandda stivrra.
(Ášši joatkašuvvá gova vuolde)
Israel Ruong stipeandda diimmá juohkima maŋŋá gárttai son ja stivra gierdat garra cuiggodemiid.
Ollugat oaivvildedje ahte stipeandda vuoiti, dutki Erika Sarivaarai ii ollašuhte eavttuid oažžut bálkkašumi.
Foandda stivra goit ii rievdadan mearrádusas.
Čakčat diibmá bođii maid ovdan ahte Israel Ruong foanda ii leat almmuhuvvon Norgga almmolaš vuođđudusregistarii.
Sierra čoahkkimis njukčamánus dán jagi muittuhii departemeanta ohpihii allaskuvlla njulget dán. Departemeanta vuordá ahte áššit maŋimustá čorgejuvvojit Sámi allaskuvlla stivrračoahkkima oktavuođas. Čoahkkin lágiduvvo Oulus Suomas.
Sámi allaskuvlla rektor Jelena Porsanger ja allaskuvlla direktevrra Maren Palismaa eaba loga sáhttit dadjat áššái maidige ovdalgo allaskuvla stivra odne meannuda ášši.