Sus leat sevdnjesvarat mánát. Áilo ja Sárá-Biggá. Sudno ruškes liiki lea seaguhus áhči áfriika- ja eatni sámi duogážis.
Ollu ballu
Eadni Silja Somby lohká ollu jurddašit vealaheami birra, ja ballá mánáid fertet gierdat sihke cielaheami ja vealaheami.
– Beaivválaččat in bija deattu dasa ahte mu mánáin lea ruškes liiki. Soai leaba dat geat soai leaba, beroškeahttá ivnnis, lohká eadni Silja Somby. Dattetge mieđiha ahte sus lea leamaš- ja lea ballu. Jurdagat badjánit.
– Makkár servvodahkii mu mánát galgaba? Movt galgaba birget boahtteáiggis? Mii doppe lea vuordime sudno...?
Oadjebas dilli Sámis
Muhto dássážii lea mannan hirbmat bures. Oadjebas sámi guovlluin eai leat vásihan unohisvuođaid.
– Min leat váldán hirbmat bures vuostá dáppe Guovdageainnus, ja dáppe leat olbmot hárjánan vaikko makkár olbmuide. Mu gánda lea movttegis, moddjás mánná ja son gohčoda iežas “sámi áfrihkálažžan”.
Bajásgeassimis deattuha sámivuođa ja sámegiela. Áhči ovddasvástádus lea dieđusge su giella ja su kulturduogáš. Leat guovttelágán bajásgeassinvuoiŋŋa mat deaivvadeaba dán ruovttus, ja de sáhttet čuožžilit digáštallamat, mieđiha Silja.
Eallin gullá maiddái sudnuide
Ja son diehtá ahte su mánát sihkkarit deaivvadeaba olbmuiguin geat cuiggodit sudno.
– Dál ain válljen jurddašit veahá ovttageardánit, ja leat veahá "naiva". Mun jurddašan ahte máilbmi lea buorre, ja oahpahan mánáidan ahte máilbmi gullá maiddái sudnuide ja ferteba váldit oasi dán máilmmis.