NRK Meny
Normal

Badjeolbmot háliidit baicce gássarevrre

Fálá orohat sávašii, ahte Snøhvit stivra ii guldal Statoila ja Hámmárfeastta sátnejođiheaddji.

Snøhvit på Melkøya
Foto: Piera Balto / NRK

Fálá orohat sávašii, ahte Snøhvit stivra ii guldal Statoila ja Hámmárfeastta sátnejođiheaddji, geat dáhtošedje muolkkut-gássa fievrredit skiippain. Badjeolbmuid miela mielde livčče baicce gássa fievrredit bohceráigge njuolgga Eurohpái, go de ii dárbbašivččii hukset eanet gássarusttegiid gáddái sin orohagas.

- Buoret bohccuide

- Diehttalas livčče dát buoret bohccuide ja sidjiide, lohka Fáláorohaga ovddeš jođiheaddji Ásllat Ánde Sara.

Aslak Ante Sara

Ásllat Ánde Sara lea Fálá badjeolmmoš ja orohaga ovddeš jođiheaddji.

Foto: Åse Pulk / NRK

Son ii leat veaháge ovttaoaivilis Statoilain gii siđášii Muolkkuid gassa fievrredit skiippain Eurohpái. Jus nu šaddá, de gassa ferte vuos gáddái ja dat mearkkaša olu eanet huksemiid. Dat šattašii ollislaš roassun orohahkii ja guohtuneatnamiidda.

- Son ballá, ahte dat rusttegat ráfehuhttet bohccuid ja nu vuorjašuvvet eret guovllus ja de bohtet vel eará dárbbut, dego stuorát elfápmolinjá ja infrastruktuvrra, dego buoridit girdišillju, hukset eanet viesuid jna. Muitala Sara.

Eanet bargosajit ja dienas

Mannan vahkoloahpa dat Hámmárfeastta sátnejođiheaddji Alf E. Jakobsen hirbmadit illudii Statoil árvalusain, ahte gáddái buktit gassa attašii eanet dietnasa ja eanet bargosajiid.

Fáláorohat baicce dáhttu caggat árvalusa ja doarjut Olgoriikkaministtar Jonas Gahr Støre ja Oljoministtar Ola Borten Moe, geat diibmá árvaleigga hukset revrevuogádaga mii dolvvošii Barentsábi gássa mearabotnis ja njuolgga Eurohpái.

- Diehttalas sii fertejit geahččalit váikkuhit dasa, go dat livčče buoret revrre bokte fievrredit gássa lulás, loahpaha Sara.

GULDAL ÁŠŠI: