– Mus lea liikká buorre dovdu, muhto mus livččii gal miella beassat giitit máŋgasa. Dan birra mun jurddašan, muhto mun háliidan liikká giitit sin, lohká filbmabagadalli Amanda Kernell
Maid ledjet jurddašan dadjat?
– Háliidivččen giitit eatni ja áhčči, Gunnel ja Maj-Doris.
Stoerre vaerie-filbma govvida áhku, guhte guhká lea čiegadan sámevuođas, muhto de su oabbá vádjola ja son ferte mátkkostit hávdádussii.
- Loga maiddái:
«Stoerre vaerie» lea ožžon olu rámi ja vuoitán bálkkašumiid sihke Göteborga filbmariemuin, Uppsala oanehisfilbmarimuin ja imagineNATIVE filbmariemuin Torontos.
Dat lei maid okta 60 filmmas Sundance filbmariemuin Ámerihkás ja čájehuvui gieskat SVT:s.
Oskar Östergren Deartnás lea filmma buvttadeaddji. Ii songe šlundu menddo sakka go ikte ii goaikkehan sidjiide bálkkašupmi.
– Ii leat miige heahti go eat vuoitán. Dušše dat ahte nominerejuvvot lea doarvái duođaštus dasa, ahte filbma lea sihke dehálaš ja buorre. Danne in leat guđege láhkái beahtahallan. Mu mielas lea dušše mearihis suohtas leat dáppe, deattuha Östergren.
David Sandberg filbma «Kung Fury» dat vuittii Guldbagge-bálkkašumi dán luohkkás.
