Čavčča válggat sámi gielddain

10 gieldda leat sámi giellahálddašanguovllus dahje sámegieldda manin dávjá gohčodit dáid gielddaid.

Raavrevihkes, Davvi-Trøndelágas, jienastat Bargiidbellodaga dahje Ovttasbargolisttu. Bargiidbellodagas lea Arnt Michelsen sátnejođiheaddjin ja sin vuosttaš evttohas dán čavčča válggain. Ovttasbargolisttus lea ges Hans Oskar Devik vuosttaš evttohassan. Suohkanis ásset birrasii 475 olbmo, ja politihkkárat dihtet olbmuid beroštit mo suohkaniin manná jos suohkan bággejuvvo ovttastahttojuvvot earáiguin.

Sihke Michelsen ja Devik jáhkkiba ahte gielddaođastusbargu dat lea mainna fertejit bargat čuovvovaš jagiid.

Suohkanis ásset 475 olbmo.

Snåases, Davvi-Trøndelágas, doppe leat vihtta evttohaslisttu, main Bargiidbellodat ja Guovddášbellodat dál leat stuorámusat. Guovddášbellodagas lea Vigdis Hjulstad Belbo sátnejođiheaddjin, muhto son ii leat šat evttohassan čakčat. Trine Hasvang Vaag lea bellodaga ođđa vuosttaš evttohas. Bargiidbellodat lei mannan válggain stuorámus bellodat Snåases ja das ledje gávcci suohkanstivrraáirasa. Seamma ollu áirasat leat Guovddášbellodagas.

- Stivregoađán áinnas suohkana ja jáhkán buorren jos dál boahtá eará stivrejupmi, lohká Bargiidbellodaga sátnejođiheaddji evttohas, Tone Våg.

Guovddášbellodaga Trine Hasvang Vaag maid áigu geavahit válgagičču ovddidit bellodaga politihka ja songe lea gearggus stivregoahtit suohkanis.

Olgešbellodagas lea Jan Ivar Sandnes vuosttaš evttohas, Sosialistálaš Gurutbellodagas Ola Kristian Johansen lea njunnošis ja Anders Dallan Mona lea Snoase Gurutbellodaga vuosttaš evttohas.

Dán suohkanis leat 2153 ássi.

Divttasvuotna:

Njunuš evttohasat lohket suohkana heajos ruhtadili stuorra áššin mainna dáhttot bargat. Suohkanis lea Bargiidbellodat stuorámus bellodat ja dál čakčat leat guhtta evttohaslisttu, ja Bargiidbellodagas lea dálá sátnejođiheaddji Tor Asgeir Johansen njunuš evttohassan. Guovddášbellodagas lea Øyvind Johansen sátnejođiheaddji evttohassan, Doarespolitihkalaš listtus Guttorm Aasebøstøl, Oktasašlisttus Filip Mikkelsen, Tysfjord bygdelistes Monica Jensen ja Sosialisttalaš Gurutbellodagas lea gis Hugo Ellingsen.

Divttasvuotna lea okta 20 gielddas gos lea vuoliduvvon jienastanahki ja nu lea vuolimus jienastanahki 16-jagi.

– Mon gal jáhkkan suohkana heajos ekonomalaš dili váikkuhit válgabohtosii, lohká sátnejođiheaddji evttohas Filip Mikkelsen, gii lea gearggus stivregoahtit suohkana.

Suohkanis ásset 2000 olbmo.

Loabát:

Bargiidbellodat lei stuorámus mannan gielddaválggain, muhto suohkanis leat Guovddášbellodagas, Olgešbellodagas ja Ovddádusbellodagas ovttasbargu, mas Guovddášbellodagas lea sátnejođiheaddjiámmát. Dáin bellodagain dat leat evttohaslisttut 2015 válggain.

(Artihkal joatká gova vuolábealde.)

– Galgat hástalit daid eará bellodagaid ja son gal áinnas stivregoahtá suohkana, lohká Bargiidbellodaga vuosttaš evttohas Kristine Haugen.

Sihke Guovddášbellodaga sátnejođiheaddji evttohas Bernhardt Halvorsen ja Olgešbellodaga njunuš Arvid Småriseth dáhtošeigga stivret suohkana. Ovddádusbellodagas lea Jon Rasdal Eliassen sátnejođiheaddjievttohas.

Dán suohkanis ásset 1008 olbmo.

Gáivuotna, Davvi-Romssas:

Bargiidbellodat lei stuorámus 2011 gielddaválggain ja ovttas Guovddášbellodagain fidnii eanetlogu Gáivuona suohkanstivrras. Čavčča válggain leat čieža evttohaslisttu ja Olgešbellodat lea dál fas searvan sierra listtuin.

Son ii lean riegádan maŋimuš go Olgešbellodagas lei listu, muhto Olgešbellodaga sátnejođiheaddji evttohas, 21-jahkásaš Jens Aleksander Simonsen vuordá gelddolaš válgagičču ja gilvalit Bargiidbellodagain fidnet stivrejumi suohkanis.

Trond Skotvold lea Bargiidbellodaga sátnejođiheaddji evttohas, Olgešbellodagas lea Jens Aleksander Simonsen njunuš sajis, Guovddášbellodagas Svein O. Leiros bajimusas ja Mandalen, Skardalen og Nordnes bygdeliste njunuš lea Ludvig Rognli. Kristtalaš álbmotbellodagas lea Einar Eriksen sátnejođiheaddji evttohassan. Ovddádusbellodaga njunuš lea ges sámediggeáirras Aud Marthinsen. Lars Nilsen lea Miljøpartiet De Grønne njunuš evttohas.

Gáivuonas ásset 2180 olbmo.

Unjárga:

Gielddas ásset badjelaš 930 olbmo ja okta daid unnimus sámi gielddain. Dán čavčča leat doppe njealja evttohaslistu, guokte unnit go gielddaválggas njealja jagi áigge.

Bargiidbellodat stuorámus bellodat gielddas ja sis lea Knut Store sátnejođiheaddjin. Son lea maid vuosttaš evttohas dán čavčča válggas. Muđui lea Marit Kjerstad Oktasašlistu vuosttaš evttohas ja Sosialisttalaš Gurutbellodagas lea gis Oddvar Betten sátnejođiheaddjievttohas. Sámeálbmot bellodat lea fidnen Bjarne Store-Jakobsen sátnejođiheaddjievttohas.

(Artihkal joatká gova vuolábealde.)

– Háliidan eambbo rabasvuođa gielddas jos šattan sátnejođiheaddjin, čilge Bjarne Store-Jakobsen.

Knut Store gal oaivvilda rabas leamaš sátnejođiheaddjin. Store oaidná ahte sihke Ovddádusbellodat ja Olgešbellodat leat jávkan sierra listun mannan válggaid rájes.

Deatnu:

Doppe leat dán čavčča gávcci evttohaslistu ja gielddas gos ásset badjelaš 2900 olbmo, hástala Ovddádusbellodat dálá Bargiidbellodaga stivrejumi.

– Mu mielas lea áigi ahte Deanus stivregohtet earát dál, lohká Ovddádusbellodaga vuosttaš evttohas, Reidar Varsi.

Sátnejođiheaddji Frank Ingilæ, gii fas lea Bargiidbellodaga njunuš evttohas, jáhkká bellodaga doallan lohpádusaid maid ovddit válggas bukte.

– Politihkalaš rehketdoallu ferte gal dan čájehit, muhto orrut lihkostuvvan ja dáhtuin ain leat mielde gieldda ovddideamen, lohká Ingilæ.

Guovddášbellodagas lea Einar Johansen njunuš, Gurutbellodagas Monica Balto, Árjjas Hartvik Hansen, Olgešbellodagas Bjarte Snorre Henriksen, Sámeálbmot Bellodagas Sylvi Rasmus ja Sosialisttalaš Gurutbellodagas Astrid J. Kjølås njunuš evttohas.

Porsáŋgu:

Dán gielddas ásset veahá badjel 3.900 olbmo ja dán čavčča leat čieža evttohaslistu. Bargiidbellodat stuorámus 2011 válggain, muhto Olgešbellodagas stivrejupmi.

Bargiidbellodagas lea Aina Borch sátnejođiheaddji evttohas, Ovddádusbellodagas Torgeir Thomassen, Olgešbellodagas dálá sátnejođiheaddji Knut Roger Hanssen njunuš, Guovddášbellodagas Jon Nikolaisen, Sosialisttalaš Gurutbellodagas Cecilie Gjennestad, Doarespolitihkalaš listtus Helge Ragnvald Olaussen ja Gurutbellodagas Elisabeth Eikeland sátnejođiheaddji evttohas.

Olgešbellodat gal joatká bargguin nu go leat njealje jagi dáhkan ja orrut lihkostuvvan, lohká Knut Roger Hanssen.

Bargiidbellodagas gal lea Aina Borch gearggus stivregoahttit ja sávvá stivrejumi mii bargá buot guovlluid ovddas Porsáŋggus.

– Mon sávan gieldda ođđa sátnejođiheaddjin bargagoahttit čavčča rájes, lohká Borch.

Kárášjohka:

Ovcci evttohaslistu leat Kárášjogas dán čavčča, gielddas gos ásset badjelaš 2.700 olbmo. Guovddášbellodat stuorámus mannan válggas ja sis lea maid Anne Toril Eriksen Balto sátnejođiheaddji ja vuosttaš evttohas fas čavčča válggas.

Bargiidbellodagas lea Svein Atle Somby vuosttaš evttohas, Kristtalaš álbmotbellodagas lea gis Lars Henrik Haugan njunuš, Gurutbellodagas Nils Nilsen Gaup, Dáloniid listtas Åshild Joks Andresen, Olgešbellodagas Torgrim Fredeng Kemi, Kárášjot listtas Sissel Gaup, Sámeálbmot Bellodagas John Nystad ja Johttiidsámiid listtus Anders Somby jr. njunuš evttohas.

– Mon gal ain oainnán ollu mii gielddas ferte dáhkkut ja dan galgat ovddidit válgagiččus, lohká Kárášjot lista Sissel Gaup.

Bargiidbellodagas leat maid ollu ášši maid galget bargat, muhto okta stuorra ášši maid sátnejođiheaddji evttohas geassá ovdan lea buorre gulahallan.

– Mii álgit ođđasit ja sávan ahte gulahallat gielddastivrras, lohká Svein Somby.

Sátnejođiheaddji Anne Toril Eriksen Balto maid háliida ain leat mielde ovdánahttimin Kárášjoga ja sávvá ođđa luohttámuša jienasteddjiin dán čavčča.

Guovdageainnus leat olles 10 evttohaslisttu dán čavčča válggain.

Dál lea Sámeálbmot Bellodaga Klemet Erland Hætta sátnejođiheaddjin, ja diet bellodat ovttas Johttisápmelaččaid listtuin leigga stuorámusat mannan válggain. Dál lea Sámeálbmot Bellodat molson nama ja servet válggaide Sámeálbmot listtu namas ja Klemet Erland Hætta lea njunuš evttohas. Bargiidbellodagas lea Johan Vasara sátnejođiheaddji evttohassan, Dáloniid listtus Hans Isak Olsen, Guovddášbellodagas Inga J. Eira, Gurutbellodagas Anton Dahl, Johttisápmelaččaid listtus Anders S. Buljo, Olgešbellodagas Mikkel Isak Eira, Ovddádusbellodagas Nils Mathis O. Hætta, Sosialisttalaš Gurutbellodagas Marit Susanne Utsi ja Partiet de kristne sátnejođiheaddji lea evttohas Anne Laila P. Skum.

Guovdageaidnu lea maid mielde válgaortnegis mas beasat jienastit dan jagi go deavddát 16 jagi.

Guovdageainnu Lagašradio redaktevra, Nils Martin Kristensen, jáhkká Arctic Gold Biedjovákki ruvkeplánaid Biedjovákkis váikkuhit válgabohtosii.

(Artihkal joatká gova vuolábealde.)

- Bellodagat mat leat lohkan čielgasit jo dahje ii Arctic Gold plánaide, šaddet válgavuoitin, lohká Kristensen, ja geassá erenoamážit ovdan Dáloniid listu ja Johttisápmelaččaid listtu.