Ruvdnaprinseassa Mette Marit, háliida movttiidahttit olbmuid lohkat girjjiid. Otne dolle son guovtti beaivásaš girjetoga mátkái, mas sámi girjjálašvuohta lea oassin. Erenoamáš sávaldat lea sus fitnat Mátta-Sámi girjebusses.
Dát movttiidahttá
Dát movttiidahttá Mátta-Sámi girjebusse hoavdda Sølvi Riise, gii liiko dasa go Ruvdnaprinseassa berošta sámi girjjálašvuođas ja dan bargui maid girjebusse dahká čalmmustahttin dihte sámi giela ja kultuvrra. Sølvi oažžu ge dál fiinna guossi girjebussii Mosseres.
Son lohká Girjebusse leat oassin bisuheames giela ja kultuvrra ja lea erenomáš dehálaš dán guovllus gos sámegielagat orrot nu bieđgguid. Son sávvá ahte sin bargu čalmmustahtto odne go ruvdnoprinseassa boahtá.
Mátkkošta girjetogain
Ruvdnaprinseassa Mette Marit mátkkošta odne ja ihttin girjetogain Bådåddjos Steinkjerii. Togas lea sihke girjekafea ja girjerájus. Dán mátkkis háliida son deaivvadit olbmuiguin ja ságastit girjjiid birra ja daid mearkkašumis. Mosseres lea Mátta-Sámi giella ja girjjálašvuohta váldo fáddan.
Dán lea ruvdnaprinseassa ieš mearridan lohká Nordlándda fylkkamánni diehtojuohkinhoavda, Kari Vassbotten. Son muitala ahte Ruvdnaprinseassa ulbmil dáinna togamátkkiin lea movttiidahttit olbmuid lohkát eanet ja ahte olbmot su bokte gávdnet girjjiid maid muđui eai livčče lohkát.
Gulda ášši: