NRK Meny
Normal

– Ovttas sii leat gievrrat

Finnmárkku fylkkagielda ja Sámediggi berreba vázzit giehtalagaid Riddoguolástuslávdegotti árvalusa oktavuođas. Ná oaivvilda Finnmárkku fylkkaráđđi Roger Hansen.

Roger Hansen
Foto: Knut-Sverre Horn / NRK

Finnmárkku fylkkaráđi, Roger Hansena, mielde Sámedikkis ja Finnmárkku fylkkagielddas lea seamma mihttomearri, nammalassii bisuhit Finnmárkku riddo- ja vuotnaguovlluid ássama.

GULDAL: Doarju Smith lávdegotti

Danin su mielas lea lunddolaš, ahte maiddái Finnmárkku fylkkagielda beassá searvat mielde daid ráđđádallančoahkkimiin mat dál leat Sámedikki ja guolástusministara gaskka Riddoguolástuslávdegotti árvalusa oktavuođas.

Miessemánu 1. beaivve ságastallamis Deanus, Roger Hansen, geavahii garra sániid. Son čuoččuhii Norgga eiseválddiid njulgestaga rievidan Finnmárkku riddo- ja vuotnaguovllu ássiid mearraguolástan vuoigatvuođaid,.

Hansen logai eiseválddiid heivehan bivddu tråláriidda, mat fievrredit mearraguliid mátta-guovllu guolleindustriijaide.

Fylkkaráđđi oaivvilda Riddoguolástuslávdegotti árvalusa addit historjjálaš vejolašvuođa ráđđehussii máhcahit ruovttoluotta árbevirolaš bivdovuoigatvuođaid, mat Finnmárkku riddo- ja vuotnaguovllu ássiin leat leamaš don doložiid rájes.