Da la julevsáme guovdásj Árrana giessevuosádus mij stuorra prosjevtav gåvåt gå gálvo ma lij dålutjis Oslon læhkám lij ruoptoldime gåsstå ajtu båhti.
Prosjækta guoddá oarjjelsáme namáv Bååstede. Ja vuosádusrahpam duorastagá lij moatte lahkáj sierralágásj gå rahpam lij sámegiellaj ja ieññilsgiellaj.
Árrana museajådediddje Harrieth Airaj lij dát riek hávsske.
– Vierttijma ieññilsgiellaj gå oattjojma guossijt ålggorijkas gudi li mannamin dáppen Divtasvuona guovlon, ja gudi lij manádam mijá duobddágijt gæhttjamin. Da lij de riek hávsske ja buorre gå aj oadtjop diededit dán Bååstede stuorra máhtsadimprosjevta birra, aj álmmuguij ålggolin mijá sebrudagá.
Lågå:
Alvaduváj
Badjelasj guhttalåges oassálasstin vuosádusrahpamij, ja ienemus oasse lidjin de turisstavantsa mañen, dagu dal amerikádna Larry Merrichs guhti lij nav ávon gå besaj mañen dán vuosádusrahpamij.
– Mujna l dal persåvnnålasj berustibme sámij birra ienebuv diehtet. Diedáv gal ålov sámij birra, valla alvaduvviv gå oadtjuv diehtet sáme musea l dán lahksin. Nav vaj dat de munnuj riek buoragit hiebaj. Mån lav nav ávon gå besav dáv gehtjatjit, javllá Merrichs.
Ájnas kulvraárbbáj
Ienep gå guoktatuvsán sáme dávvera Vuona Álmmukmuseas ja Kultuvrahiståvrrålasj museas máhtsaduvvi dal sáme guovlojda, ja galggi háldaduvvat guhtta museajs jali museåssudagájs ma li Sámedikke háldon.
Divtasvuonan, Hábmerin ja ietján Sálto guovlon tjoahkkeduvvin dávvera sulle 100-150 jage dás åvddåla.
Museajådediddje Harrieth Aira subtsas muhtem museabargge ja muhtema gudi berustin sáme dávverijt mannin sáme ednamin oasstemin ja tjoahkkimin dájt dáverijt, ja fállin dajt dávverijt dajda museajda ma dalloj lidjin Roandemin ja Oslon.
– Dát vuosádus vuoset dal muhtem dajs dávverijs ma lulu boahtet sáme museajda ja Sábmáj. Ållo dájs dávverijs e gávnnu mijá museajn. Dávvera majt dálla de gæhttjalip ruoptus åttjudit, nav vaj boahtá ávkken sámijda, ja vaj vuojnnep ja oahpásmuvvap dán kultuvraárbbáj.