NRK Meny
Normal

– Suhtav gå ep la agev bessam sámástit

Lovisa Negga uddni ådå julevsáme poplávllagav luojttá, suv nuppev julevsámegiellaj.

Lovisa Negga
Foto: Fredrik Augustsson

Julevsáme artissta Lovisa Negga, Svieriga bieles le suv ådå lávllagav gåhtjudam «Hájkka Sájvva».

– Lávlov gåktu gájkka le aktan ja vaj luonnduj mujttep liehket gærrása ja huvsulasj, tjielggi Lovisa Negga.

- Julevsámegiella le ájnas giella

Jagev la juo dájna lávllagijn barggam ja tjielggi manen sunji lávlla ja giella le nav ájnas.

– Gássjel la julevsábmáj lávllagav dahkat dan diehti gå la sierralágásj ja ietjálágásj giella. Gássjel la julevsámegielav oahppat, valla mierrediv dav tjadádit dan diehti gå giella le munji nav ájnas, javllá sån.

– Ájnas le oadtjot sámástit, sámegiellaj tjállet ja nubbe nuppijn sámástit. Ep la dav agev bessam dahkat ja dassta mån suhtav.

Lávllu avtaárvvusasjvuoda birra

Hájkka Sájvva le juolos lávlla gånnå subtsas jasskavuodav ietjas birrusin gávnnat ja ábjjat dav mij birrusin gávnnu.

– Lávllagin subtsastav gájkka dán væráldin le sæmmi árvvo. Iv jáhke bahániera jali bahás ássje gávnnuji. Valla boastodádjadusá ja aktuvuoda gávnnuji. Jus nubbe nubbáj láhkusip ja væráldav ja ulmutjijt iehttsegoahtep de álkkep sjaddá, javllá artissta.

– Diedon ienep lávllagijt galgav sámegiellaj dahkat, ælla ietjá vejulasjvuoda. Gatjálvis le gåktu sjaddá gullut, hiejttet sån.

GULÁ ÅLLES LÁVLLAGAV: