Ruovdderahtedåjmadahka hæhttu jerajt tsieggit

Dá vahko NRK tjálij 17 áldoj birra ma tågas jámas vuoddjuduvvin nágin mijla Mosjøena oarjjelis. Moarmesmáno dijmmá rájes tåhka la gåddåm 90 boahttsu dán guovlon.

Valla Ruovdderahtedåjmadagán ælla plána jerajt dán guovlluj tsieggit. Dáv Sámedikkeráde Thomas Åhren ij rat lijkku, ja suv mielas bierri jera tsieggiduvvat.

– Jus ij de hæhttup udnásj dilijn viessot gå tåhka boahttsujt gåddå, jur nav gåktu árabut dá vahko vásedijma, javllá Sámedikkeráde.

Ælla plána jerajt dán guovlluj tsieggit

Sámedikkeráde mielas bierriji dá vuoddjudime nåhkkut ja Ruovdderahtedåjmadahka bierri åvdåsvásstádusáv válldet.

– Ájnna mij viehkket la juogádisáv tsieggit mij boahttsuv hieret ruovdderahtáj vádtset ja danna vuoddjuduvvat. Dáv Ruovdderahtedåjmadahka hæhttu dahkat, dát ássje la sijá åvdåsvásstádus, tjielggi Åhren.

Ruovdderahtedåjmadagá rahtejådediddje Nordlandan Jan Birger Almåsbro diedet ælla plána dán guovlluj jerav tsieggit, ja vuoset Ruovdderahtedåjmadagá doajmmapládnaj mij vihpá jahkáj 2017.

– Valla ep la javllam mij ep galga boahttsuæjgádij ságastit dán dile birra, jus li guovlo gånnå jerra bierriji tsieggiduvvat.

Ælla ájnna siválattja

Almåsbro javllá Ruovdderahtedåjmadahka boahttsuæjgádijt miedet ienemus ássjij, ja tjuottjot ij la dåssju Ruovdderahtedåjmadagá åvdåsvásstádus, valla boahttsuæjgádijn la aj åvdåsvásstádus.

– Mij åvdåsvásstádusáv válldep, duola dagu dijmma ja javlaj maŋŋel gå biednigijt siestijma helikopterij, vaj boahttsuæjgáda máhttin boahttsuj jåhtelappojt jåhttet. Dáv sij iesj sihtin dahkat, valla diedá ettjin dájt biednigijt adnuj válde.

Bierri jerajt ájádallat

Valla Sámedikkeráde miela milta bierri Ruovdderahtedåjmadahka dárkkelit jeraj barggat, farra gå ietjá dåjmaj.

– Svieriga bielen li gæhttjalam moadda dåjmaj, duola dagu boahttsuv jienajn balldet, sij li ja happsajn gæhttjalam. Valla vuojnunagi ájnna mij doajmmá la jeraj tsieggit, vásstet Sámedikkeráde Thomas Åhren.

Rahtejådediddje Almåsbro diedet boahttsuháldadus Nordlandan ja Nuortta-Trøndelagan jagen 2009 mierredin makkir jera vuostatjin galggin tsieggiduvvat, ja javllá Ruovdderahtedåjmadahka le dáv plánav tjuovvum mij boahttsuæládus iesj la dahkam.

– Vuostasj vuorodibme lij nielja kilomehtera guhka jerra Sáltoduoddarin Semska ja Sørelva gasskan. Nuppát vuorodibme lij avtse kilomehtera guhka jerra Sefrivatn ja Holmvassdalena gasskan, mij moarmesmáno jali biehtsemáno ålliduvvá. Guolmát vuorodibme la Snåsa-jávre gátte milta.

Ællim diededam

Rahtejådediddje diedet boahttsuæjgáda ællim diededam Ruovdderahtedåjmadahkaj boahttsuj birra ma lidjin rahte guoran, ja vuoset ásadussaj mij gåhtjoduvvá boahttsudiedádus.

– Boahttsuæjgát diedet gå lij boahttsu rahte milta. Gå diededuvvá de tåga vuodji ienemusát 40 km/t, ja máhttá ganugit jus li boahttsu.

Sámedigge dájna ássjijn barggi

Sámedikkeráde dálla dáv ássjev giehtadalli, ja galggi dán birra fylkamánnijn Nordlandan ságastit boahtte vahko.

– Duodden galggap moarmesmánon departementajn dán birra ságastit, hiejtet Åhren.