Norgga Stuorradikki ealáhuslávdegotti lahttu, Torgeir Trældal, lea čállán reivve eanandoalloministtarii, Lars Peder Brekkii, mas son gáibida ollislaš guorahallama bohccobiergofitnodaga Boalvvir BA reastaluvvama ektui.
– Dát lea dakkár ášši, man Riikkadárkkástus ferte guorahallat, Trældal oaivvilda.
GULDAL:
Torgeir Trældal lea maiddái Ovddádusbellodaga riikkaságadoalli. Son lohká iežas čađahit politihkkalaš daguid bokte dan, ahte Riikkadárkkástus iskagoahtá dán ášši, dalán dan maŋŋá go son oažžu vástádusa Norgga eanandoalloministtaris.
Mediaásahus TV 2:š beaškalii dán mánu álggus ođđasa das, ahte Boalvvir BA reastaluvvá.
Oaččui 10 miljon
Boalvvir BA lea ožžon máŋga miljon ruvnnu reanttukeahtes loanaid Norgga stáhtas. Fitnodat ii galgga leat máksán dáid loanaid ruovttoluotta nugo bealit ledje šiehttan.
Oktiibuot galgá fitnodahkkii leat juolluduvvon lagabui logi miljon ruvnno almmolaš ruhta.
Ii hálit kommenteret
Riikkadárkkástusa doaibmi doaimmahathoavda, Helge Strand Østtveiten, ii hálit kommenteret dan, áigugo Riikkadárkkástus iskkat Boalvvir BA reastadanášši ruhtadeami.
– Son ii sáhte kommenteret dán ášši, go Riikkadárkkástus ii leat árvvoštallan dan. Riikkadárkkástus čađaha dábálaččat riskaanalysa, man vuođul árvvoštallet leago riskka ahte ruđat eai geavahuvvo eavttuid ektui.
– Jus lea riska ahte ruđat eai geavahuvvo eavttuid vuođul, de sii iskagohtet ášši,
Helge Strand Østtveiten čilge.