– Eambbo rievssat go dieđihuvvon
Dál lea Finnmárkku rievssatbivdu bistán beannot vahku. Nu go Finnmárkkuopmodat dieđihii, de lea uhccán rievssat dán čavčča. – Muhto eai dal nu unnán go ledje ovddalgihtii dieđihan, oaivvilda guovdageaidnulaš rievssatbivdi Anton Dahl. Su mielas lea FeFo baicce vuovdán menddo ollu bivdokoarttaid muhtin guovlluin Guovdageainnus. – Vázzet vissa measta maŋŋálagaid ja baldálagaid go nu ollu bivdit leat, dadjá Dahl. NRK ii leat FeFo ožžon ságaide odne.