– Oslove Noereh galgá bargat dan ovdii ahte sámi nuorain lea deaivvadanbáiki gávpogis, muitala ođđa jođiheaddji Sajje Solbakk (18).
Guovvamánu 10. beaivvi lei Oslo Sámi viesus nubbi jahkečoahkkin Oslove Noerehs.
Jahkečoahkkin válljii ođđa stivrra. Sajje Solbakk (18) válljejuvvoi jođiheaddjin, ja Viktor Bomstad (23) nubbinjođiheaddjin. Dávvet Bruun-Solbakk (20), Lotte-Varja Lauritzen (25), ja Ivvár Máhtte Eira Strand (29) lea ges válljejuvvon stivralahttun, ja Ane Margrethe Ugelvik (20) ja Kristine Ballari (23) fas sadjásašlahttun.
Sajje Solbakk lea bajásšaddan Romssas ja orru dál Oslos.
Sápmelaččat lassánit
Sápmelaččat Oslos lassánit, ja nu dahká sámi beroštupmi gávpogis maid.
– Vuosttaš doaibmajagi lea Oslove Noereh jo šaddan dehálaš sámi nuoraide, ja mun illudan joatkit dan buori barggu, muitala Solbakk.
Oslove Noerehs leat iešguđet lágan lágideamit dego klubba ”Idja”, pizzaeahkedat ja kurssat. ”Idja” lea ovttasbargu Rikssceneniin.
– ”Idja” lea jo lihkostuvvan bures. Badjel 100 nuora bohte Ailu Valle & Trio Boogiemen vásihit, ja mis galget leat oktiibuot guhtta Idja-lágideamit dán jagi, dadjá Solbakk.
Oslove lea báikkálaš searvi nuoraidorganisašuvnnas Noerehs. Álggahuvvoi jági áigi, ja lea vuosttaš báikkálaš searvi Noerehs.
– Oslos lea guhkká leamaš dárbu sierra sámi nuoraid searvái, lohká Solbakk.
– Dáppe lea stuorra sámi áŋgiruššan nuoraid gaskkas, son lasiha.
Oslove Noereh galgá bargat buot sámi nuoraid ovddas Oslos ja lágaš birrasis. Oslove Noereh galgá láhčit nuoraide deaivvadanbáikki vuoi nanne sámi gullevašvuođa.
– Dat orru leamin nu, ahte sámi nuorat šaddet eanet dihtomielalačča iežaset sámi duogážii go orrot stuorát gávpogiin, čilge Solbakk. Noereh ii leat bellodatpolitihkkálaš dahje oskolašgullevaš searvi.